Скопјанец на возраст од 51-година во полицијата пријавил дека уште во јули го дал својот автомобил на поправка, но досега не му бил вратен назад. Мајсторот што ветил дека ќе го поправи возилото постојано наоѓал изговори.

„Д. С. (51) од с. Бардовци, Скопско, пријавил дека на почетокот на јули со Н. С. се договорил да му го поправи неговото возило, но до денот на пријавувањето Н. С. не му го вратил возилото поправено и секогаш наоѓал разни изговори“, велат од МВР.

Со пријавениот бил извршен разговор, а возилото „опел омега“ било најдено и вратено на сопственикот.

По целосно документирање на случајот, против Н. С. ќе биде поднесена пријава.

Деветнаесетгодишна девојка добила тешки повреди во сообраќајна несреќа што се случи синоќа на регионалниот пат Скопје – Тетово, кај селото Желино.

Според информациите од полицијата, во несреќата учествувале автомобил „фолксваген голф“ со тетовски регистарски ознаки, управуван од Е. К. (19) од селото Требош, и товарно моторно возило „сканија“ со тетовски регистарски ознаки, управувано од Љ. Т. (50) од селото Сараќино.

„Во несреќата тешки телесни повреди добила Е. К. констатирани во Клиничката болница Тетово“, велат од МВР.

Извршен бил увид на местото на настанот од екипа од СВР Тетово.

Седумдесетгодишен скопјанец го нарушил јавниот ред и мир на начин што со пиштол испукал неколку куршуми во воздух.

Според информациите од полицијата, пукањето се случило вчера на пладне од балкон во стан во Ѓорче Петров.

„Од лицето бил одземен пиштолот ‘М- 70’ калибар 9мм, две рамки за пиштолот, 12 куршуми калибар 9мм, футрола за рамка, ловечка пушка ‘црвена застава’ калибар 16/70мм, два патрона за ловечка пушка ‘белон 2,50 мм’, футрола за ловечка пушка и две дозволи за поседување и носење оружје на негово име“, велат од МВР.

По документирање на случајот ќе следува соодветен поднесок.