Дваесет и едногодишно момче (Б.Б.) од селото Орашац, кумановско, паднало од зграда, а подоцна и починало.

Несреќата се случила додека младиот работник изведувал градежни работи на зграда во изградба на булевар „Гевгелија“ во Гевгелија.

По падот тој се здобил со тешки телесни повреди и бил пренесен во болницата во Гевгелија. Поради сериозноста на повредите, подоцна бил препратен во Комплексот клиники „Мајка Тереза“ во Скопје, каде што починал.

За настанот бил запознаен јавен обвинител од Основното јавно обвинителство Гевгелија, а увид на местото извршиле инспектор од Државен трудов инспекторат и екипа на ОВР Гевгелија.

Влада не ја гледа објективноста на барањето за лидерска средба. Портпаролката на ВМРО-ДПМНЕ, Марија Митева, одговарајќи на новинарско прашање за барањето на опозицијата за одржување лидерска средба, го повика СДСМ да го официјализира барањето.

Според неа, прилично е чудно што барање за лидерска средба доаѓа преку медиуми.

„Се надеваме дека знаат да испратат официјални барања за лидерски средби, нека испратат и ние ќе размислиме и ќе одлучиме“, изјави Митева.

И премиерот Христијан Мицкоски верува дека нема потреба од одржување лидерска средба за стабилноста на државата.

„Ако навистина има аргументи да се оди во таа насока, зошто да не, но не гледам причина за такво нешто во моментот, ако гледам објективно“, изјави Мицкоски.

Од СДСМ попладнево велат дека е шокантно што Митева и Владата сметаат дека безбедноста и мирот во државата не заслужуваат лидерска средба, особено во услови кога секојдневно има нови вооружени инциденти на улиците и растечки тензии со подгревање на меѓуетничките односи.

„Вчера повторно се пукаше во Чаир, има и повредени, пред само еден ден запалени беа возила и дуќан во Куманово, а претохдно се пукаше среде Скопје. Над 25 инциденти со огнено оружје се случија во изминатите неколку месеци. Од друга страна, се случија сериозни инциденти со палења на македонското државно знаме, деца во униформи во училишта, повици за реваншизам и дополнителни тензии. Сериозно се подгреваат страстите, кои влијаат на влошување на меѓуетничките односи, а кои се темел на стабилноста на земјата. Затоа, неопходно е сите релевантни политички фактори да преземат одговорност за смирување на растечките тензии и обезбедување стабилност“, велат од СДСМ.

Опозициската партија додава дека е потребен итен политички дијалог за да се надмине тековната криза, да се смири наелектризираната атмосфера и да се испрати јасна порака до јавноста за смирување и стабилност.

Во вторник, 10 декември, во 16 часот, ќе биде одржан протест поради загадениот воздух.

Граѓанската иницијатива „Зелен хуман град“, која го најави протестот, соопшти дека ќе почне од Министерство за животна средина, па преку Собранието ќе заврши пред Владата.

„Протестираме бидејќи секоја година во Македонија се бележат приближно 3.828 смртни случаи предизвикани од изложеност на честичките ПМ 2,5, кои се меѓу најштетните за здравјето. Тоа изнесува 17,7 % од вкупната смртност во државата. Овие честички се поврзани со широк спектар на здравствени проблеми, како што се белодробни заболувања, срцеви удари и рак на белите дробови. Особено загрижувачки е дека еден од девет смртни случаи кај деца до една година во Македонија е поврзан со загадениот воздух! Загадувањето во Скопје и другите градови во Македонија со години е проблем на сите жители, а со тоа и на секоја власт. Колку побргу се почне со спроведување мерки, кои меѓусебно се надополнуваат и си го зголемуваат позитивниот ефект врз квалитетот на воздухот, толку побргу ќе го решиме овој долгогодишен проблем“, велат од граѓанската иницијатива.

Од надлежните институции, Владата и општините бараат да преземат итни и среднорочни мерки за справување со загадувањето на воздухот.