Лидерот на Алијансата за Албанците и министер за здравство, Арбен Таравари, најави дека вечерва ќе ги продолжи разговорите со лидерите од „Вреди“ по најавите дека коалицијата ќе прерасне во една политичка партија, која како еден голем политички субјект ќе настапи на претстојните локални избори, но за тоа сè уште нема согласност од Таравари.

„Од ‘Вреди’ ги продолжуваме разговорите. Вечерва имам состанок, сите четири-пет претседатели на партиите. Континуирано има комуникација. Се надевам дека работните групи ќе продолжат и ќе изнајдат најдобро можно решение што нема да биде фрустрирачко или, да речам, демотивирачко за партиите што се дел од ‘Вреди’“, рече денес лидерот Таравари по посетата на болницата во Гостивар.

Несогласувањата во коалицијата „Вреди“ излегоа во јавност на крајот на минтиот месец. Партнерите во коалицијата на неколку состаноци не успеаја да се договорат која парија колку градоначалници ќе предложи за локалните избори наесен. Имаше шпекулации дека министерот Таравари побарал 50 отсто од кандидатите за градоначалници да бидат од неговата партија, на што не биле согласни другите партнери во коалицијата. Таравари ниту демантира ниту потврди дека барал 50 отсто од кандидатите да бидат од неговата партија. Тој рече дека не бил известен оти другите лидери веќе се договориле „Вреди“ да стане политичка партија и преку медиумите им порача дека може да го задржат името, а Алијансата за Албанците да оди сама на локалните избори.

Лидерот на Демократско движење и министер за животна средина, Изет Меџити, како еден од основачите на “Вреди“, го повика Таравари да остане во коалицијата и му порача да ги прекине преговорите со Демократската унија за интеграција.

Група вработени лица во штипскиот затвор реагираа со демант на прес-конференцијата на директорот на Управата за извршување санкции, Александар Пандов, и на директорот на штипскиот затвор во врска со случувањата во штипскиот затвор.

Вработените во реакцијта, што ја објави штипската телевизија „М нет“, велат дека директорот во своето излагање кажал многу невистини, кои не кореспондираат со реалноста и со преземените службени дејства на овластените службени лица.

„Како вработени во установата во целост ја негираме ваквата лошо составена приказна, која се пласира на ироничен начин и со цинизам во јавноста, одговорно тврдиме дека вистината е сосема поинаква и постапувањето во однос на пронаоѓањето сомнителни предмети фрлени од страна на лицата што дојдоа до затворот во овој настан преку безбедносниот ѕид беше во правец на тоа да го пронајдеме она што е фрлено и доколку има што и да било недозволено, да го одземеме и да пријавиме во СВР – Штип.

Во текот на ноќните часови потрагата заврши без успех, но во текот на утринските часови, со самото разденување, повторно е направен обид да се пронајдат предметите, при што успешно е пронајдена најлонска кеса, во која е пронајдена и сомнителната прашеста и тревна материја. По нејзиното пронаоѓање, преземени се сите оперативно-протоколарни дејства, известен е директорот на установата, пријавен е настанот во полиција, инспектори од СВР – Штип и крим-полицијата пристигнаа во затворот и пронајденото е предадено за понатамошно постапување. Евидентни се целосното постапување и преземените конкретни чекори во самиот дневен извештај на затворската полиција, а со сигурност го има и во полицискиот билтен.

Во ниеден момент нема простор за сомнеж дека некој од затворските полицајци постапувал спротивно на своите работни задачи и соработувал со осуденото лице во негова полза, како што беше споменато на прес-конференцијата од страна на директорите.

Исто така, сакаме да напоменеме дека токму за осуденото лице Ж. Ж. директорот на установата на неколку наврати дозволува посети надвор од работното време со телефонски повици кон одговорниот на смена, тоа е заведено во рапортните книги на установата, директорот на установата има дозволувано и вонредни пакети за ова осудено лице, но ништо од тоа не беше кажано на споменатата прес-конференција!“, напишаа вработените во КПУ „Затвор Штип’ до редакцијата на „М нет“.

Претходно, Пандов на прес-конференцијата тврдеше дека некој фрлил дрога преку оградата, а откога полицијата во мракот не ја нашла дрогата, затворските полицајци и затворениците следниот ден се правдале дека барале изгубен часовник. Целиот настан го регистрирале безбедносните камери во затворот. Пандов тврдеше дека кога директорот ги прашал затворската полиција и командирот што барале и зошто барале, зошто не реагирале, објаснувањето и во нивната службена белешка било дека затвореникот Ж. Ж. си играл со кучката Цеца, а имал скап часовник. Кучката му го зела часовникот додека трчала низ тревникот и му го изгубила, па вработените, за да му излезат во пресрет, го барале часовникот“, рече тогаш Пандов.

Извршени се претрес и вонредна контрола во фирма во Гостивар, која поседува одобрение за одгледување канабис за медицински цели.

Фирмата е во сопственост на А. К. (52) од Република Албанија и А. Р. од Босна и Херцеговина, а за време на претресот биле најдени пластични буриња полни со марихуана за кои фирмта не поседува никаква документација.

Од МВР инфрмираа дека претресот и контролата во објектот биле извршени во присуство на едниот сопственик и управител А. К. и вработениот Џ. И. (39) од Република Словенија, со постојано живеалиште во селото Горно Седларце, Тетовско.

„Утврдени се низа неправилности во однос на процесот на одгледување на растението канабис, што е спротивно на Законот за контрола на опојните дроги, поради што постои сомнение дека производството на канабис било наменето за нелегалниот пазар. Исто така, било утврдено дека во две хали се врши сушење канабис, при што во една од халите се пронајдени девет пластични буриња исполнети со готов производ – сув цвет од канабис, за кои правното лице не поседува никаква документација“, велат од МВР.

По насоки од јавен обвинител, пронајдениот канабис (растенијата и сувиот цвет) е одземен и предаден во Агенцијата за управување со одземен имот, а сопственикот и вработениот се приведени.