Одлуката на Државната изборна комисија независните кандидати да може да поднесат кандидатури за локалните избори со само два потписа од избирачи можно е да направи хаос на гласачките ливчиња. Премиерот Христијан Мицкоски предупреди дека ако изборниот процес е неуспешен, Владата има можност да именува владини повереници.

„Не исклучувам ни таква можност, можно е гласачкото ливче да биде седум-осум метри, можно е гласачкото ливче да ги обесхрабри граѓаните да излезат, да се намали цензусот, но тука сакам да предупредам дека во согласност со Уставот и законот, ако не е успешен избирачкиот процес, Владата е таа што именува владини повереници. Неодговорното однесување на поединци и од одделни политички партии резултира со ваков тип на можности. Сега, дали тоа ќе се случи, ќе видиме многу бргу од денеска. До 1 септември треба да заврши овој процес, па да видиме како ќе биде, инаку не ја исклучувам и оваа можност“, рече премиерот Мицкоски по увидот во градежните активности за нова градинка во Драчево.

Државната изборна комисија (ДИК) за претстојните локални избори донесе нов правилник, со кој се олеснува процесот за кандидирање независни кандидати за градоначалници и за советници. Според новите измени, за поднесување кандидатска листа од група избирачи потребни се само два потписа. Ваквата одлука следува по укинувањето на два члена од Изборниот законик од страна на Уставниот суд, со што се создаде правна празнина во постапката за собирање потписи.

Краен рок за поднесување кандидатури е 13 септември. Првиот круг за гласања е закажан за 19 октомври.

Вчера околу 23:30 часот во ОВР Струга било пријавено дека на регионалниот пат Струга-Дебар, во село Велешта, струшко, патничко возило „мерцедес“ со струшки регистарски ознаки, управувано од 19-годишниот Е.Н. од село Велешта, излетало од коловозот.

Од здобиените повреди на местото на несреќата починал возачот Е.Н., а лекар од Итна медицинска помош констатирал смрт.

Увид на местото на несреќата извршила увидна екипа на ОВР Струга, а по наредба на јавен обвинител телото на починатиот било дадено на обдукција.

фото: архива

Јавен обвинител од Основното јавно обвинителство Скопје, постапувајќи по кривичната пријава од Министерството за внатрешни работи против едно лице за кривично дело – Измама, денеска ги разгледа наводите и прибавените докази, по што против осомничениот одлучи да поведе истрага за продолжено кривично дело – Изнуда по член 258 став 1 во врска со член 45 од Кривичниот законик.

Пријавениот, во периодот од 15.07.2025 до 28.07.2025, со намера да се стекне со противправна имотна корист, уверувал едно лице дека против него ќе биде поведена судска постапка доколку не исплати околу 1.500.000 денари.

Познавајќи го оштетеното лице од минатото, во повеќе наврати од различни телефонски броеви, претставувајќи се во име на министерот за внатрешни работи и тројца јавни обвинители, преку пораки го контактирал осомничениот и ги барал од него паричните средства со цел да биде изземен од обвинение, односно да не биде спроведена постапка против него.

Оштетеното лице, во четири наврати на различни локации во Скопје, му ги дало на осомничениот побараните парични средства.

Јавниот обвинител донесе одлука да поведе истрага за изнуда, бидејќи од преземените дејствија на осомничениот произлегува дека тој користел сериозна закана да го присили оштетениот да стори нешто на штета на својот имот. За ова дело е предвидена построга затворска казна која изнесува најмалку една година, а може да биде изречен и законскиот максимум.

Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.