Премиерот Христијан Мицкоски, одговарајќи на новинарско прашање, ја коментираше формулацијата „достапен јазик“, наместо македонски јазик, што ја употреби Министерството за надворешни работи на Бугарија.

„Не ме чуди, ги потврдуваат тезите дека Бугари во Устав не е единствено барање, туку комплетно редефинирање на македонскиот идентитет. Но, ова се денови кога треба да простуваме, да се сплотуваме како нација. Како народ ќе сфатиме дека без оглед дали сме власт или опозиција, за некои прашања мора да бидеме заедно“, изјави Мицкоски по посетата на Соборниот храм по повод христијанскиот празник, Божик.

Тој изрази жалење што, како што рече, претходната влада влегла во една авантура и го заглавила евроинтегративниот процес, прифаќајќи капитулација, односно ултиматум од Бугарија.

„Апелирам до опозицијата – подадена е раката – да ги напуштат нивните тези и да застанат во одбрана на националните интереси. Ова е таков ден, немам што повеќе да додадам“, рече премиерот.

Говорејќи за доставувањето на Акцискиот план за правата на заедниците, претходно деновиве Мицкоски наведе дека македонската страна била советувана од Брисел документот да ѝ биде доставен на Софија еден ден порано, како гест на добра волја.

„Така направивме – го дадовме ден однапред. И сега им сметало што е на македонски јазик. Во меѓународна употреба, согласно Уставот, официјален јазик е македонскиот јазик. Јас не можам, како претседател на Владата, ниту пак министерот, да го кршиме Уставот. Ако мислат дека ќе го испратиме на друг јазик – ние немаме друг јазик“, изјави Мицкоски.

Премиерот додаде дека Бугарија повторно ја пропуштила шансата да покаже добрососедство, а на прашањето дали имало и други забелешки од Софија, одговори дека немало.

Бугарското Министерство за надворешни работи соопшти дека „Република Бугарија со загриженост ги забележува последователните тези на властите во Скопје, кои остро се разминуваат со есенцијата на Европскиот консензус од 2022 година“. Во соопштението не се спомнува македонскиот јазик, туку се користи формулацијата „јазик достапен за граѓаните“.

Во Преговарачката рамка, во став 35, се наведува дека Северна Македонија преку инклузивен процес треба да усвои Акциски план за заштита на правата на малцинствата и заедниците, кој ќе биде предмет на постојано следење во текот на пристапниот процес. Во став 37 се посочува дека напредокот во поглавјата за владеење на правото ќе биде тесно поврзан со спроведувањето на Акцискиот план, што значи дека без негова имплементација не може да се затвори ниту едно преговарачко поглавје.

Претседателката на државата Гордана Сиљановска-Давкова, претседателот на Владата Христијан Мицкоски и претседателот на Собранието Африм Гаши упатија божиќни честитки до православните христијани, нагласувајќи ги вредностите на мирот, солидарноста, семејството и заедништвото како темели на стабилно и праведно општество.

Претседателката Сиљановска-Давкова: И годинава, божиќните празници ќе ја зацврстат нашата вера и надеж и ќе нè потсетат на човековата насушна потреба од чинењето добри дела.

Претседателката на државата, Гордана Сиљановска-Давкова, им го честиташе големиот христијански празник Божиќ на сите православни верници, посакувајќи празничниот мир да завладее во секој православен дом. Таа истакна дека раѓањето на Спасителот претставува силна инспирација за добрина, меѓусебна помош и човечност.

Во својата порака, Сиљановска-Давкова повика на соборност и солидарност меѓу граѓаните, нагласувајќи дека заедништвото е клучно за напредокот на општеството.

„Да му се радуваме на животот и да придонесуваме за доброто на заедницата. Да ги отвориме ширум нашите срца за сите ближни, та така сплотени во соборноста, да ја креираме и градиме благосостојбата на македонското општество“, истакна таа.

Мицкоски: Стабилната држава се гради врз здрави семејства

Претседателот на Владата, Христијан Мицкоски, во својата божиќна честитка порача дека Божиќ е празник кој потсетува на суштинските вредности што го држат општеството заедно – семејството, верата, солидарноста и меѓусебната почит.

„Божиќ е ден кога тишината зборува погласно од зборовите. Ден кога се потсетуваме на она што навистина нè држи заедно: семејството, верата, солидарноста и меѓусебната почит“, наведе Мицкоски, додавајќи дека Христовото раѓање нè враќа кон вредностите што со векови го обликувале карактерот на народот.

Тој нагласи дека силата на едно општество започнува во домот и дека стабилната држава се гради врз здрави семејства, а иднината се чува преку грижа за најмладите. Во време на брзи промени и бројни предизвици, според него, Божиќ е повик да се застане, да се размисли и да се врати кон солидарноста, заемната грижа и одговорноста кон ближниот.

„Грижата за семејствата е грижа за иднината на Македонија. Децата заслужуваат сигурност, внимание и средина во која ќе растат со јасни вредности и надеж“, порача премиерот, упатувајќи желби за мир, здравје и спокој во домовите.

Гаши: Божиќ како поттик за соживот и демократска стабилност

Претседателот на Собранието, Африм Гаши, во честитката по повод православниот Божиќ истакна дека овој празник е можност да се нагласи значењето на меѓусебното почитување, соживотот и општествената хармонија како темелни вредности на институционалната и демократската стабилност на државата.

Во свое лично име и во име на сите пратеници, Гаши им посака на граѓаните мир, здравје и благосостојба во семејствата, истакнувајќи дека празничниот период треба да биде поттик за заедничка одговорност, разбирање и граѓанска соработка.

„Среќен Божиќ“, порача претседателот на Собранието.

Од Украина, меѓу другото, се очекува да создаде услови младите мажи да ѝ служат на безбедна и економски здрава Украина, наместо да заминуваат во европските земји, изјави германскиот канцелар Фридрих Мерц обраќајќи му се на украинскиот претседател Володимир Зеленски.

„Економскиот капацитет ќе биде неопходна гаранција дека Украина ќе може уверливо да ја одврати Русија во иднина. Драг Володимире, сакам ова отворено да го кажам: тоа подразбира и одредени очекувања за Украина. Тоа вклучува – и вие го знаете тоа, веќе разговаравме за ова во Брисел – дека Украина мора да биде организирана на таков начин што нејзините млади мажи ќе ѝ служат на безбедна и економски здрава Украина, а не да заминуваат во Германија, Полска или Франција, како што е случај сега“, нагласи Мерц во Париз по состанокот на Коалицијата на подготвените, пренесува „Укринформ“.

Според неговите зборови, тоа е очекување кое Украина „може и мора да го исполни“.

Украинската влада на седница одржана на 26 август ја ажурираше процедурата за преминување на државната граница. Мажите на возраст од 18 до 22 години сега можат непречено да ја преминуваат границата за време на воената состојба. Соодветните измени стапија на сила на 28 август, еден ден по официјалното објавување на резолуцијата.

Во Германија живеат околу 1,2 милиони Украинци. Нивниот број во последните години се зголемува, главно поради младите мажи помлади од 22 години, наведува украинската агенција.

Фото: Depositphotos