Црна хроника
Кривична пријава за поранешен директор на јавното комунално претпријатие од Струмица

Полицијата поднесе кривична пријава против З.Г.(56) од Струмица, поранешен директор на јавно комунално претпријатие од Струмица поради постоење на основано сомнение дека сторил кривично дело „злоупотреба на службена положба и овластување“ и против Е.Н.(42), управител на правно лице од Струмица за сторено кривично дело „злоупотреба на службена положба и овластување“.
Првопријавениот З.Г., извршувајќи ја функцијата директор на јавно комунално претпријатие од Струмица во текот на 2022 година, злоупотребувајќи и искористувајќи ја својата службена положба склучил договор за период од 10 години за закуп на деловен простор лоциран во Градската капела на Градските гробишта во Струмица со пријавената Е.Н. како управител на правното лице од Струмица, со закупнина од 14.200 денари со ДДВ месечно или вкупно 170.400 денари за една година.
Во 2023 година пријавените З.Г. и Е.Н. со умисла извршиле и второ временски поврзано дејствие, односно потпишале уште еден ист договор за закуп за период од 10 години и покрај тоа што претходниот договор од 2022 година бил во важност, за кое нешто од страна на Е.Н. како управител веднаш е извршена уплата за закупнина во вкупен износ од 1.704.000 денари.
Од горенаведеното е утврдено дека првопријавениот З.Г. во текот на 2022 година и 2023 година и овозможил на второпријавената Е.Н. како управител на правното лице од Струмица да врши дејност во објект кој согласно Законот за гробишта и погребални услуги не смеел да се издава на трети лица и со тоа дејствие истиот овозможил јавното комунално претпријатие противправно да се стекне со 1.874.400 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Топ
Маж нападнал девојче со нож, полицијата пукала за да го спречи, но тој избегал

Велешката полиција вчера попладне испукала неколку предупредувачки куршуми во воздух во обид да го спречи нападот од 23-годишно лице кое држело остри предмети и се заканувало на граѓани и на полициски службеници. Осомничениот успеал да побегне, но неговиот идентитет е познат и по него се трага.
Инцидентот се случил на 13 јуни 2025 година, околу 18 часот, кога во СВР Велес бил пријавен физички напад врз малолетно девојче на улицата „Хаџи Косте“ во Велес. Нападот го пријавил нејзиниот татко, 25-годишниот Е.Х. од Велес, кој информирал дека неговата ќерка била нападната од С.У. (23) од Велес, кој користел и метален предмет при нападот. Дополнително, откако на местото пристигнала и мајката на девојчето, 27-годишната сопруга на пријавителот, С.У. и кон неа упатил закани.
На местото на настанот интервенирале полициски службеници кои го затекнале С.У. со остри предмети во рацете. Му дале наредба да ги фрли предметите, но тој не се придржувал, продолжил да им се заканува и се движел кон нив со намера да ги нападне.
Во тој момент, полицијата испукала еден предупредувачки куршум во воздух и повторно му наредила да ги остави предметите. И покрај тоа, С.У. продолжил со заканувачко однесување, по што бил испукан и втор предупредувачки куршум. Дури тогаш, напаѓачот го фрлил еден од предметите и почнал да бега.
Полицајците испукале уште два предупредувачки куршуми додека го следеле бегалецот, кој во меѓувреме го фрлил и вториот остар предмет. Двата предмети се пронајдени и одземени од страна на полицијата.
За случајот се известени јавен обвинител и Центарот за социјални работи Велес, а по С.У. интензивно се трага.
Црна хроника
Му измериле 2,88 промили алкохол откако излетал од патот и се превртел со возилото

Полициски службеници од ОВР Кочани денеска, нешто по полноќ во 00:06 часот, го лишиле од слобода 42-годишниот Д.Д. од Виница, откако кај него биле измерени 2,88 промили алкохол во крвта. Тој бил затекнат во сообраќајна несреќа што сам ја предизвикал, управувајќи патничко возило „Фолксваген голф“ без регистарски ознаки.
Несреќата се случила на излезот од село Зрновци во правец кон село Лески, во кочанскиот регион, каде што возачот изгубил контрола врз возилото и се превртел на коловозот.
Според информациите од Министерството за внатрешни работи, лицето е веднаш исклучено од сообраќај, а случајот е пријавен кај надлежен јавен обвинител.
По целосно документирање на случајот, против него ќе биде поднесена соодветна пријава по член 297-а од Кривичниот законик – за „безобѕирно управување со моторно возило“.
Топ
Го следеле од менувачница, го нападнале и му ги зеле парите

Основното јавно обвинителство Куманово поведе истражна постапка против две лица осомничени за кривично дело – Разбојништво по член 237 став 1 од Кривичниот законик, откако пред четири дена физички нападнале маж и му одзеле поголема сума пари.
Според информациите од обвинителството, осомничените го забележале оштетениот додека разменувал девизи и почнале да го следат со намера да му ги одземат средствата. Откако тој се приближил до неговата семејна куќа, двајцата го нападнале, нанесувајќи му удар со тупаница во пределот на главата. Жртвата паднала на земја и изгубила свест, по што му биле одземени 172.000 денари и 37.460 српски динари.
Со цел обезбедување на истрагата и спречување на можноста за бегство, судија на претходна постапка им определи мерка притвор во траење од 30 дена на двајцата осомничени.
Обвинителството продолжува со прибирање на докази за целосно расветлување на случајот.