Судењето за дискотеката „Пулс“, во која загинаа 63 лица и речиси 200 беа повредени, продолжува денеска со трето рочиште. Се очекуваат воведните зборови од одбраната, кои требаше да почнат минатата недела, но бранителите на обвинетите побараа интегрираниот обвинителен акт, покрај тоа што судот им го испратил ним како бранители, и официјално да им го испрати и на обвинетите оти, како што рече Петре Шилегов, адвокат на еден од обвиннетите, не е работа на бранителите да бидат судски доставувачи.

Судијката Диана Груевска-Илиевска ги одложи воведните зборови за следно судење и остави рок од шест дена за судска достава на интегрираните обвиненија и до обвинетите.

Откога не почна со воведни зборови, на рочиштето од минатата недела судијката Груевска-Илиевска побара оштетените да се изјаснат за отштетни побарувања. Но, и оваа постапка не можеше до крај да биде завршена бидејќи немаше адреси од сите оштетени, па уште на рочиштето од минатата недела побара нова листа со имејлови од сите оштетени и најави дека во истиот рок од шест дена, во кој треба да се достават интегрираните обвиненија и на обвинетите, ќе се доставуваат и известувања до сите оштетени дека треба да се појават на судење за да се изјаснат за отштетни побарувања.

Иако судијката Груевска-Илиевска најави динамика од две судења неделно, поради недостигот од адреси од оштетените и поради неиспратените интегрирани обвиненија до обвинетите, мораше едното судење да го одложи и затоа судењето продолжува денеска.

За трагедијата во „Пулс“ обвинети се 35 физички и три правни лица. Судењето почна на 19 ноември со воведни зборови од одбраната.

Претседателот на Венецуела, Николас Мадуро, изјави дека неговата земја е подготвена да се одбрани додека САД размислуваат за копнен напад. Тензиите се на врвот поради големото американско воено распоредување во Карибите, кое вклучува носач на авиони и илјадници војници, пишува Скај њуз.

Американскиот претседател Доналд Трамп се сретна со својот тим за национална безбедност синоќа откако минатата недела предупреди дека копнените напади би можеле да започнат „многу наскоро“. Иако деталите од состанокот не беа објавени, портпаролката на Белата куќа, Каролин Ливит, им изјави на новинарите: „Претседателот има многу опции што се на маса – и ќе го оставам тој да зборува за нив“.

Американските сили извршија најмалку 21 напад во последните неколку месеци врз бродови за кои тврдат дека превезуваат наркотици до американските брегови. Белата куќа го обвинува Мадуро за вмешаност во трговија со дрога, што тој жестоко го негира.

Мадуро: „Ова е психолошки тероризам“
Мадуро, кого западните земји најчесто го сметаат за диктатор, вчера на митинг во Каракас изјави дека Венецуелците се подготвени да „ја бранат земјата и да ја водат по патот на мирот“. „Преживеавме 22 недели агресија што може да се опише само како психолошки тероризам“, им рече тој на своите поддржувачи.

Венецуела вели дека нападите на САД врз бродовите, во кои загинаа повеќе од 80 луѓе, се еднакви на убиство. Според Каракас, вистинскиот мотив на Трамп е да го собори Мадуро со цел да ги заплени венецуелските резерви на нафта.

Пратеникот на американскиот претседател Доналд Трамп, Стив Виткоф, и зетот на претседателот, Џаред Кушнер, ќе се сретнат со рускиот претседател Владимир Путин во Москва во вторник на разговори за завршување на најкрвавиот конфликт во Европа по Втората светска војна, објави Ројтерс.

Откако се врати во Белата куќа, Трамп постојано повторува дека сака крај на војната во Украина, но неговите досегашни напори, вклучително и средбата со Путин во Алјаска, досега не вродија со плод. Минатата недела беше протечен мировен план на САД од 28 точки, за кој украинските и европските претставници велат дека е премногу услужлив кон Москва.

Русија бара Украина да се откаже од членството во НАТО, да ја задржи руската контрола врз една петтина од украинската територија и да воведе ограничувања на украинската војска. Европските земји дадоа свој контрапредлог за мир на разговорите во Женева, а САД и Украина објавија дека создале „ажурирана и ревидирана мировна рамка“ за да се стави крај на војната.

Портпаролот на Кремљ им изјави на новинарите дека средбата на Виткоф со Путин ќе се одржи во втората половина од вторник. Тој одби да разговара за црвените линии на Русија, велејќи дека „мегафонската дипломатија“ не помага во процесот. Белата куќа објави дека на Виткоф во руската престолнина ќе му се придружи Кушнер, објави Ројтерс.

Путин повтори дека е подготвен за мировни преговори, но дека Русија ќе продолжи со својот воен напредок доколку Украина го отфрли договорот. Русија моментално окупира повеќе од 19 проценти од украинската територија, што е еден процент повеќе отколку пред две години.

Според украински извори, Русија напредувала со најбрзо темпо во 2025 година од 2022 година. Руските воени команданти го известија Путин во понеделникот дека ги освоиле стратешки важните градови Покровск и Вовчанск, објави Ројтерс.