Полициски службеници од СВР Штип го привеле Т.Ј. (44) од Кочани, по претходна пријава дека физички ја нападнал својата 16-годишна ќерка, соопштија од полицијата.

Според пријавата, на 5 јануари 2026 година, во семејниот дом, Т.Ј. со употреба на тврд предмет ја нападнал неговата ќерка и ѝ го одзел мобилниот телефон.

По целосно документирање на настанот, против него ќе биде поднесена соодветна пријава.

СВР Охрид поднесе кривична пријава против М.Т. (40) од охридското село Лескоец поради постоење основи на сомнение за сторено кривично дело „Убиство во обид“, информираат од полицијата.

Како што се наведува во соопштението, на 30 декември 2025 година околу 01:00 часот, М.Т. со огнено оружје пукал кон паркирано патничко возило „Голф“ во близина на струшкото село Ливада. Возачот, Џ.Д.П. (40) од Охрид, се здобил со тешки телесни повреди, констатирани во Општата болница во Струга.

Потоа, со закани кон сопатничката во возилото, М.Т. ја принудил да влезе во неговото возило. СВР Охрид ја поднесе кривичната пријава поради сериозноста на настанот и постоењето основи за сторено кривично дело.

Осумдесет и шестгодишна жена од Виница пријавила дека била жртва на телефонска измама во која останала без 30.000 евра, откако непознато лице ѝ се претставило како лекар од Словенија и ја довело во заблуда дека нејзината ќерка е тешко повредена.

Како што соопштија од ОВР Виница, на 23 јануари 2026 година во 08:50 часот, жената пријавила дека лицето телефонски ја контактирало и ѝ кажало дека нејзината ќерка, која престојувала на привремена работа во Словенија, се здобила со тешки телесни повреди и дека за итна операција била потребна поголема сума пари.

Според пријавеното, таа ги подигнала парите од банка и, согласно упатствата што ги добила, во дворот од семејната куќа ги предала на лице кое дошло да ги преземе.

Откако подоцна стапила во контакт со нејзината ќерка, жената сфатила дека станува збор за измама.

Од полицијата информираат дека се преземаат мерки за целосно расчистување на случајот.