На денешната проштална средба со амбасадорката на Кралството Јапонија во нашата земја, Н.Е. Кеико Ханеда, претседателот на Собранието Талат Џафери, изрази задоволство од досегашната соработка со јапонската Амбасада, односно со првиот резидентен амбасадор, Н.Е. Ханеда и нагласи дека очекува во наредниот период да продолжи оваа соработка и со новиот амбасадор, со што ќе продолжи трендот на јакнење на политичките и економските релации меѓу двете земји.

Тоа ќе резултира со зголемување на јапонските инвестиции, и интензивирање на соработката во областа на медицината, туризмот, културата и други области.

„ Во овој период, пред нас се три големи приоритети. Очекуваме во месец декември оваа година, отворање на пристапните преговори со ЕУ, борба со епидемијата предизвикана од Ковид 19 како и справување со последиците по економијата предизвикани од оваа пандемија, и јас очекувам дека успешно ќе се справиме со овие предизвици,“ нагласи претседателот Џафери.

Јапонската амбасадорка, Н.Е.Кеико Ханеда, го потенцираше своето задоволство од досегашниот престој во нашата земја во овие три години во својство на амбасадорка на Јапонија и изрази уверување дека соработката со македонското Собрание ќе продолжи и со нејзиниот наследник на највисоко ниво и во таа насока, упати благодарност за досегашната соработка и комуникација меѓу Амбасадата на Јапонија и Собранието на Република Северна Македонија, како и со Парламентарната група за соработка. Исто така, амбасадорката констатираше дека во овие три години се случија многу добри и позитивни настани во Република Северна Македонија, како што се полноправното членство во НАТО и датумот за почеток на преговорите со ЕУ и, изрази очекување дека претседателот Џафери и во наредниот период ќе продолжи успешно да го води Собранието и да се справува со предизвиците.

На крајот, и двајцата соговорници се согласија дека соработката меѓу Собранието на Република Северна Македонија и јапонската Амбасада ќе продолжи како и досега, на највисоко ниво.

.

Претседателот Стево Пендаровски, денеска, во „Вила Водно“, го врачи признанието „Инженерски прстен“ на најуспешните дипломирани студенти од областа на инженерските дисциплини во Република Северна Македонија.

Инженерскиот прстен, чијашто цел е признание, но и афирмација на инженерските професии и поттик за формирање на квалитетен инженерски подмладок, го доделуваат Инженерската институција на Македонија и Комората на овластени архитекти и овластени инженери, под покровителство на Претседателот на Република Северна Македонија. Годинава добитници на признанието се 8 дипломирани инженери од различни области.

Во своето обраќање, претседателот Пендаровски ја нагласи важноста на инженерството во креирањето на целокупната иднина на секое општество.

„Живееме во свет кој брзо се менува и кој е зависен од современите технологии кои отвораат нови перспективи, но, и свет кој е ранлив и кршлив што особено го покажува актуелната пандемија со Ковид-19. Како идни инженери, вие сте дел од нашиот човечки потенцијал врз кој мора да се темели иднината на нашата земја“, истакна претседателот Пендаровски.

Според Претседателот, без разлика дали станува збор за архитекти, машинци, информатичари, технолози, електротехничари, градежни, земјоделски или шумарски инженери, нивниот професионален предизвик е остварување на личен развој, но и прогрес за пошироката заедница во која живеат.

„Се надевам дека најголем дел од вас ќе продолжат да се надградуваат, да напредуваат и професионално да се остваруваат во својата татковина. За тоа да се случи мора да бидат создадени сите предуслови од релевантните субјекти: државните институции, системот на образованието, бизнис-заедницата, за вашата иднина и професионалниот развој да бидат врзани со матичната земја“, нагласи претседателот Пендаровски, посакувајќи им на младите инженери натамошен успех и да бидат движечка сила која ќе овозможи напредок и општество на благосостојба.

Признанието „Инженерски прстен“ се доделува по 17-ти пат, а досега го добиле 178 дипломирани инженери.

Во рамките на дводневна интензивна агенда, министерот за надворешни работи Бујар Османи оствари средба со потпретседателката на Европската Унија одговорна за демократија и демографија, Дубравка Шуица.

За време на средбата се разговараше за текот на подготовките на Конференцијата за иднината на Европа и вклучувањето на земјите од Западен Балкан, како и за политиките на младите и спречувањето на одлив на квалификуван кадар во високо развиени земјите.

Потпретседателката Шуица го запозна Османи со плановите за Конференција за иднината на Европа што е еден од приоритетните проекти на Европската комисија кој треба да даде придонес за развојот на политиките на ЕУ на среден и долг рок со цел подобро да се одговори на предизвиците со кои ЕУ се соочува. Оваа конференција ќе претставува платформа која треба да ги поврзе европските граѓани, цивилното општество и европските институции со цел заеднички дискусии каква ЕУ сакаат европските граѓани и како да се управува со неа. Конференцијата за иднината на Европа ќе биде нов форум за отворена, инклузивна и транспарентна дебата.

Заеднички беше заклучено дека политиките на проширувањето на Унијата треба да продолжи паралелно со дискусиите за иднината на Европската унија и нејзините внатрешни реформи.

„Учеството на земјите од Западен Балкан на Конференцијата за иднината на Европа ќе биде заедничка придобивка и дополнително ќе ги зголеми напорите за градење политичка волја меѓу земјите-членки во напредокот со проширувањето кон Западен Балкан”, нагласи Османи.

Министерот Османи ја запозна соговорничката со актуелна ЕУ агенда на земјата, како и мерките што ги презема Владата на Република Северна Македонија за подобрување на животните и работните услови со цел подобрување на социо-економскиот живот на земјата.

На оваа средба и претходеа средби на Османи со Андреас Шидер, претседавач со Мешовитиот парламентарен комитет помеѓу Република Северна Македонија и Европската Унија, Илхан Ќучук, известителот за Северна Македонија во Европскиот Парламент како и со Андреј Ковачев, потпретседател на ЕНП.