Двајца жители на Куманово се приведени откако синоќа, за време на полувремето од кошаркарски натпревар, се обиделе физички да нападнат играч од домашната екипа и да му го соблечат дресот.

„На 17.05.2025 во 20.00 часот, полициски службеници од СВР Куманово ги лишија од слобода А.Ј. (36) и Д.С. (29), двајцата од Куманово“, информира Министерството за внатрешни работи.

Инцидентот се случил во спортската сала на средното училиште „Перо Наков“ во Куманово, на полувремето од натпреварот меѓу МКК Куманово и МЗТ Скопје, кој се играл во рамки на кошаркарската Супер лига.

Според информациите од МВР, двајцата осомничени се обиделе да нападнат играч од домашниот тим, МКК Куманово, и да му го соблечат дресот.

„Лицата се приведени во полициска станица и по целосно документирање на случајот против нив ќе биде поднесена соодветна пријава“, велат од полицијата.

27-годишен жител на село Јанковец, ресенско, бил приведен откако бил фатен како управува возило под дејство на алкохол и без возачка дозвола, соопшти денес Министерството за внатрешни работи.

Инцидентот се случил на 18 мај 2025 година, во 02:18 часот по полноќ, кога полициски службеници од ОВР Ресен извршиле сообраќајна контрола во селото Јанковец и го сопреле патничкото возило „мерцедес“ со скопски регистарски таблички. Возачот, идентификуван како Д.К. (27), бил под дејство на алкохол, а при проверката било утврдено дека не поседува ни возачка дозвола.

„Кај лицето е утврдено присуство на алкохол во крвта од 2.38 промили, што претставува сериозен ризик за сообраќајната безбедност. Тој веднаш е исклучен од сообраќај и приведен во полициска станица“, информираат од СВР Битола.

Од МВР додаваат дека по целосно документирање на случајот, против лицето ќе биде поднесена кривична пријава по член 297-а од Кривичниот законик – „безобѕирно управување со моторно возило“.

Двајца од тројцата осомничени за намерно предизвикување пожар во викенд куќа во селото Капиново, општина Чашка, се веќе во притвор, а за третиот осомничен се преземаат мерки за пронаоѓање, информира Основното јавно обвинителство Велес.

Според истрагата, осомничените – двајца од Прилеп и едно лице од село Ореше – на 10 мај со возило со прилепски регистарски таблички дошле до викенд куќата, насилно влегле во објектот и намерно го запалиле со запалива течност. Во моментот на инцидентот, сопствениците не биле присутни, но куќата целосно изгорела, при што е причинета голема материјална штета. Повредени лица нема.

Пожарот бил изгаснат од Територијалната противпожарна единица Велес, а истрагата ја воделе СВР Велес во координација со криминалистичките служби од БЈБ и ОВР Прилеп.

Како што соопшти МВР, двајца од осомничените – Ѓ.П. (56) од Ореше и Д.Д. (37) од Прилеп – се уапсени на 16 мај и задржани во полициска станица. Третиот осомничен, С.М. (40) од Прилеп, сè уште е во бегство.

Јавниот обвинител до надлежниот суд доставил предлог за определување мерка притвор за сите тројца. За двајцата приведени мерката веќе стапи на сила, а за третиот ќе се применува по неговото лоцирање и апсење.