Во напуштен објект на тетовската улица Љуботенска вчера напладне полицијата уапсила двајца тетовци кај кои бил пронајден хероин.

Како што информираат од МВР, станува збор за Б.Љ.(40) од Тетово и Н.Р.(37) од тетовското село Милетино.

Двајцата се задржани во полициска станица и по целосно документирање на случајот ќе им бидат изготвени соодветни поднесоци.

Во стан на улицата Виа Игнатија во Скопје, вчера бил пронајден починат 65-годишен маж, кој живеел сам.

Лекар од Службаат за итна медицинска помош констатирал смрт, а увид на местото извршила екипа на СВР Скопје.

По наредба на јавен обвинител, телото на починатиот било дадено за обдукција.

Скопското основното јавно обвинителство поднесе обвинение против 40-годишник од Тетово за сторено продолжено кривично дело телесна повреда.

Обвинетиот со престојувалиште во Скопје, во период од 30 август до 1 септември, во два наврата, со умисла ја повредил поранешната сопруга.

На 30 август, во семејниот дом во Скопје со тупаници повеќе пати ја удрил во пределот на главата и во десната подлактица.

На 1 септември, во парк во близина на основно училиште во Аеродром, тој повторно со умисла ја повредил оштетената, која со нивните малолетни деца била излезена на прошетка.

Обвинетиот со такси-возило ја чекал поранешната сопруга пред влезот на училиштето, по што тргнал кон неа и неколку пати со тупаници ја удрил во главата и во десната подлактица.

Од двата напади кај оштетената билe нанесени повреди како набиеници, подливи и акутна реакција на стрес.

Со цел обезбедување на присуството на обвинетиот во текот на кривичната постапка, како и заштита од повторување на насилното однесување, надлежниот јавен обвинител до судот доставил посебен предлог за продолжување на претходно определениот притвор.​