Декларацијата усвоена од лидерите на Процесот „Брдо – Бриони“ на самитот укажува на важноста од брзото проширување на ЕУ за целиот регион на Западен Балкан, а не за одделни земји.

Лидерите на Словенија, Хрватска, Албанија, Црна Гора, Косово, Северна Македонија, Србија и на Босна и Херцеговина присуствуваа на состанокот по повод 10-годишнината од иницијативата.

Заедничката изјава го поздравува усвојувањето на Економскиот и инвестициски план на ЕУ за Западен Балкан од октомври 2020 година, како и фактот дека, како што се наведува, е придружен со значителни финансиски средства.

Документот нагласува дека, како составен дел на Европа, Западен Балкан има права и обврски да го следи развојот на земјите членки на ЕУ што е можно повеќе, со олеснет пристап до Унијата.

Лидерите на Процесот „Брдо – Бриони“ истакнаа дека се посветени на заедничката стратешка визија за Европа и ја истакнаа нивната посветеност на мирот и стабилноста, вклучително и добрососедските односи.

„Западен Балкан е дел од Европа и обединувањето на Европа не е целосно без Западен Балкан. Со членството во ЕУ границите меѓу земјите членки стануваат помалку важни, што создава поширок простор за соживот и плуралност на националните интереси“, се вели во документот.

„Ја повикуваме ЕУ да го забрза процесот на пристапување многу бргу и да го вклучи целиот Западен Балкан во Унијата имајќи го предвид напредокот што го направи секоја земја“, порачаа политичките лидери.

Тие изразија јасен став за отворање на пристапните преговори со Албанија и Северна Македонија, без натамошно одложување.

Во однос на предизвиците на пандемијата на Ковид-19 и нејзините економски и социјални последици, тие ја истакнаа потребата да се искористи закрепнувањето како можност за зелена и дигитална транзиција, што ќе доведе до одржлив развој и ќе им понуди можности на помладите генерации.

Претседателот на Хрватска, Зоран Милановиќ, најави дека ќе се спротивстави на условите што ги поставува Бугарија за почеток на преговорите на Северна Македонија во ЕУ.

По состанокот во Процесот „Брдо – Бриони“, Милановиќ оцени дека условите што се поставени пред Македонија за почеток на преговорите со Унијата се невозможни.

„Станува збор за невозможни услови што им се поставени за преговори со ЕУ и тие се однесуваат на содржината во учебниците по историја во Северна Македонија. Тоа што во моментот една членка на ЕУ го прави во Северна Македонија е навлегување во интимен простор. Се бара еден кандидат за време на преговорите за членството да ја дефинира својата национална генеза во учебниците по историја онака како што тоа го бара соседната држава. Тоа е влез во интимен простор и не треба да се случува“, рече Милановиќ додавајќи дека отворено ќе се спротивстави.

Според него, претседателските избори во Франција, кои ќе се одржат в година, ќе влијаат на сите земји во регионот кои се во претпристапни преговори со ЕУ.

Премиерот и претседател на СДСМ, Зоран Заев, изјави дека предвремени парламентарни избори нема да има и дека следните ќе се одржат во 2024 година.

„Тесното мнозинство ја држи Владата будна. Сметам дека време е да одработиме до крај, така што следните парламентарни избори би биле во 2024 година“, одговори премиерот Заев на прашањето дали со локалните се можни и предвремени парламентарни избори во интервју во дневникот на јавниот сервис.

„По сериозни процеси, како што беа уставните измени, новата методологија на ЕУ, ние излеговме на избори за да провериме дали имаме поддршка од граѓаните, дали одиме по добар пат. Граѓаните одлучија дека сме на добар пат и тоа е доволно, имаме мандат 4 години. Северна Македонија страда од предвремени избори. Еднаш треба да одработиме цел мандат за да ги видиме резултатите од Владата со мандат од 4 години. Предвремени избори имаат влијание врз економијата, тоа значи заостанување. А сите тие договори од Преспа, со Бугарија, се за економијата, за работни места и избор, повисок БДП, Европа да ја донесеме дома“, потенцира Заев.