Црна хроника
Побарано задолжително психијатриско лекување за обвинет за напад и обид за убиство врз полицајци

Основното јавно обвинителство Скопје до Основниот кривичен суд Скопје поднесе предлог за изрекување мерка на безбедност задолжително психијатриско лекување и чување во здравствена установа за едно лице обвинето за кривични дела убиство и напад врз службено лице при вршење работи на безбедноста.
По спроведена истражна постапка, надлежниот јавен обвинител утврди дека на 3 април 34-годишниот жител на село Горно Коњаре, во состојба на непресметливост поради трајно душевно заболување, се обидел да убие едно лице со кое претходно имале кратка вербална расправија. По расправијата, обвинетиот отишол во својот дом, од каде што зел нож и го пробол оштетениот во пределот на слабината нанесувајќи му тешки телесни повреди од животозагрозувачки карактер. Половина час подоцна обвинетиот сериозно се заканил дека ќе ги нападне четворицата полициски службеници кои постапувале по наредба да го лишат од слобода поради претходно стореното кривично дело. Кога полициските службеници дошле во неговиот дом, тој излегол на вратата повторно држејќи нож во рацете. Еден од полициските службеници му наредил да го фрли ножот, но обвинетиот одбил да го стори тоа и им се заканил. Полициските службеници се повлекле во дворот и застанале во близина на службеното полициско возило, а обвинетиот почнал да им се приближува со крената рака во која го држел ножот. Во тој момент еден од полициските службеници му се приближил на обвинетиот и со употреба на средства за присилба му ја фатил раката, ножот паднал на земјата и обвинетото лице било лишено од слобода.
Јавниот обвинител предложи претходно определената мерка притвор за обвинетиот да се укине, но тој да не се пушти на слобода, туку до завршување на постапката за определување на мерката за безбедност привремено да се смести во здравствена установа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Две жени нападнати од нивните соседки

МВР во дневниот билтен информира за два случаи на насилство извршени од страна на соседки.
На 24.03.2023 во 16.30 часот во Полициска станица Гази Баба П.С.(81) од Скопје пријавила дека околу 12.00 часот во близина на нејзината куќа на подрачје на Гази Баба поради нерасчистени имотно правни односи била физички нападната од нејзината сосетка Б.Р.
На 23.03.2023 во 14.35 часот во Полициска станица Куманово Е.Г.(43) од Куманово пријавила дека во Куманово била физички нападната од нејзината сосетка В.П.(46) од Куманово.
Се преземаат мерки за расчистување на случаите.
Црна хроника
Експлозија на плинска боца во Карпош, полицаец заврши во болница

Вчера на улицата Разловечко Востание во стан сопственост на Д.Ѓ.(60) експлодирала плинска боца, по што настанал пожар.
Пожарот е изгаснат од противпожарната единица Скопје, соопшти МВР.
Поради вдишување чад еден полициски службеник бил пренесен во Градската општа болница „8-ми Септември“ за укажување на лекарска помош.
Увид на местото на настанот извршила полициска екипа.
Црна хроника
Полицаец вознемирувал неколку ученички во средно училиште во Скопје

Полициски службеник вербално вознемирувал неколку ученички во средно училиште во Скопје.
По пријавата во полицијата веднаш се преземени соодветни мерки за расчистување на случајот и известен е јавен обвинител и Одделот за внатрешна контрола, криминалистички истраги и професионални стандарди, соопшти МВР.
Против лицето ќе биде поведена и постапка за утврдување на дисциплинска одговорност и суспендирање од работното место до донесување на решение во дисциплинската постапка.