Вкупно 149 казни се изречени вчера на територијата на град Скопје поради сообраќајни прекршоци, информираат од Министерството за внатрешни работи.

За непочитување на брзина на движење казнети се 47 лица, 18 добиле казна за возење без возачка дозвола, седум за технички неисправни и нерегистрирани возила.

„Изречени се пет санкции за користење на мобилен телефон, седум за возење под дејство на алкохол, четири за некористење сигурносен појас и 23 мерки за непрописно паркирани возила“, информираат од МВР.

Додаваат дека засилените сообраќајни контроли продолжуваат и во наредните денови.

Струмичката полиција на 28 февруари добила дојава, по што службеници извршиле контрола во селото Банско, каде била организирана свадба на која присуствувале околу 300 гости.

Како што информираат од МВР, прославата со која биле прекршени мерките против ширењето на коронавирусот, ја организирале Д.И.(57) и А.И.(54) од Банско за нивниот син Е.И.(26).

Свадбата била прекината, а по целосно документирање на случајот, ќе бидат поднесени кривични пријави за непостапување според здравствените прописи за време на епидемија.

Пукање со огнено оружје се случило синоќа во селото Љубанци, скопско, јави МВР.

Полициски службеници излегле на местото и по преземените мерки било констатирано дека настанала расправија помеѓу А.С.(24) од с.Волково, скопско и М.С.(26) од с.Никиштане, скопско, од една страна и А.Ј.(20) од с.Љубанци и Ф.Д.(22) од с.Радишани, скопско, од друга, по што А.С. бил физички нападнат.

Според пријавеното, М.С. помислил дека и тој може да биде нападнат и испукал неколку куршуми во воздух и заминал од местото. Се преземаат мерки за расчистување на случајот.