Полицијата рано изутринава кај наплатната рампа Романовце лишила од слобода возач и седум илегални мигранти од Египет. По целосно документирање на случајот ќе биде поднесен соодветен поднесок.

Како што се посочува во информацијата од МВР, околу 2:10 часот на 30 ноември, на автопатот Скопје–Куманово, кај наплатната рампа Романовце, при вршење мото-патролна дејност од страна на полициски службеници од Мобилната единица за безбедност на сообраќајот на патиштата при Секторот за сообраќајни работи, било сопрено патничко моторно возило „фолксваген шаран“ со тетовски регистарски ознаки, управувано од С.И.(44) од Тетово.

При контролата во возилото биле забележани лица кои при легитимирање немале никакви документи за идентификација. Во разговор со возачот, тој посочил дека требало да ги превезе лицата од Гевгелија до Куманово. Во возилото се превезувале седум лица, сите по нивен исказ државјани на Египет, на возраст од 17 до 52 години.

Полициските службеници во изминатите два дена лишија од слобода тројца возачи во Македонска Каменица, Кратово и Куманово поради сериозни прекршоци во сообраќајот.

На улицата „Александар Македонски“ во Македонска Каменица, вчера околу 23 часот полицијата го привела Д.Ј. (54) откако управувал возило „Хјундаи“ под дејство на алкохол. Измерени му биле 2,00 промили алкохол во крвта.

Неколку часа подоцна, однсно ноќеска во 1:59 часот, на улицата „Гоце Делчев“ во Кратово, лишен од слобода е Д.К. (25) кој управувал „Ауди“ со кочански регистарски ознаки. Тестирањето покажало присуство од 1,72 промили алкохол.

Во Куманово, на регионалниот пат кај селото Доброшане, вчера во 14:10 часот, полицијата го привела И.М. (45) кој управувал „Мицубиши“ со брзина од 91 километар на час, на делница каде максимално дозволената брзина е 40 километри на час.

Од МВР соопштија дека по целосно документирање на случаите, против тројцата ќе бидат поднесени кривични пријави за „безобѕирно управување со моторно возило“.

Во СВР Охрид утрово било пријавено дека во Општата болница во Охрид е донесен 34-годишниот С.М. од Охрид, кај кого биле констатирани повреди нанесени со остар предмет, соопштува МВР.

Пријавата била поднесена на 30 ноември 2025 година во 07:45 часот.

Од полицијата информираат дека се преземаат мерки за целосно расчистување на случајот и утврдување на околностите под кои настанале повредите.