Петнаесетгодишно момче од Скопје синоќа било физички нападнато од страна на поголема група непознати лица, јави МВР.

Според пријавеното, додека тој и двајца негови другари шетале по кеј на реката Вардар, бил пресретнат и нападнат од лицата.

Полицијата вели дека презема мерки за целосно расчистување на случајот.

Педесет и петгодишна жена од селото Јанковац била пронајдена почината во куќа на пријатели од истото село.

Според изјавите на присутните во куќата, таа пред два дена вечерта со сопругот отишла на гости. Околу 22.30 часот на жената и е слошило, по што легнала и најверојатно во текот на ноќта починала.

„Увид извршиле Јавен обвинител и екипа од Полициската станица Ресен. По наредба на Јавен обвинител, телото на починатата било дадено на обдукција“, велат од МВР.

Утрово во полицијата 19-годишник со иницијали П.С. од Крива Паланка пријавил дека пред дискотека во градскиот парк бил физички нападнат од лице од обезбедувањето во дискотеката.

„Според пријавеното, во моментот кога П.С. и неговите другари излегле од дискотеката, непознато лице фрлило шише кон патничко возило „ауди“, до кое тие застанале. Исто така, според пријавеното, тогаш им се доближиле И.Ц., Б.И.(23) од Скопје и Ф.М.(25) од Скопје, обезбедување во дискотеката, и побарале од нив да ја платат штетата бидејќи сметале дека тие го фрлиле шишето. Според пријавеното, во еден момент И.Ц. физички го нападнал П.С. и од паричникот му одзел пари. Се преземаат мерки за расчистување на случајот“, соопшти полицијата.