Вработените во Македонска пошта од целата држава денес излегоа на протест преку кој побараа да им се исплати платата која им доцни повеќе од 45 дена. Ќе продолжат да протестираат се додека не им биде исплатена платата, па оние кои сакаат да земат пратки од Пошта или бараат друга услуга, нема да ја добијат. Вкупно 1700 вработени и околу 300 поштари со договор на дело се уште ја чекаат декемвриската плата за чија исплата законскиот рок е 15 во месецот.

Во оваа компанија 60% од вработените работат за минималец, и тој минималец не можеме да го земеме., вели претседателот Синдикатот, Сашо Димитриевски

„Ова ни се случува веќе неколку месеци, ова е трет или четврт месец како ни доцни платата, но овој месец го проби дното бидејќи денес сме веќе 23. Вработените се крајно револтирани затоа што и покрај тоа што во оваа компанија 60% од вработените работат за минималец, и тој минималец не можеме да го земеме. Овој протест ќе трае се додека не се создадат условите за добивање плата“, рече претседателот на синдикалната организација на Македонска пошта, Сашо Димитриевски.

Тој нагласи дека нема да дозволат и следниот месец да им доцни исплатата на платите и уште следната недела ќе преземат активности и ќе го известат Управниот одбор дека следниот месец ќе излезат на протест уште на 15 или 16 ако не добијат плата. Не ја исклучуваат и можноста за поригорозни чекори и штрајк.

„Овој проблем во Македонска пошта не е од сега, се влече веќе петнаесетина години, живееме на шкрги. Проблемот е тоа што дефинитивно имаме лоша организација во поштата. Во последно време се прават некои напори, со Управниот одбор правиме некоја систематизација, сакаме да ги решиме тие проблеми, но малку споро оди тоа. Погрешни луѓе има на вистинските места на кои треба да работат“, вели претседателот на Синдикатот Димитриевски.

Денешниот протест е поддржан од Сојузот на синдикати на Македонија (ССМ). Претседателот на ССМ, Слободан Трендафилов кажа дека 2000 семејства се оставени без пари во најдолгиот месец од годината.

„Додека ние се подготвуваме да протестираме за зголемување плата овие луѓе протестираат за исплата на ниската плата. Срамота е да ги оставите без плата, а да изигрувате шерифи по пошта, да првите притисоци врз луѓето, да ги напаѓате, да се обидувате да ги спречите да протестираат. Нема да отстапиме од барањето за исплата на плати и нема да отстапиме од барањето да им се зголемат платите, а да добијат луѓето и опрема за работа. Како што можете да видите сите од дома дошле кој како можел да се облече. Сметам дека вината треба да биде фрлена на раководството, а раководството може да си побара од основачот веднаш да интервенира и веднаш да биде исплатена платата, во текот на денешниот ден. Во спротивно колегите нема да продолжат со работа“, рече претседателот на ССМ, Трендафилов.

Тој најави дека вработените ќе бидат пред Поштите и нема да ги вршат задачите кои им ги даваат „газдите“ без да ги платат.

Македонија ги зајакнува преносните линии за електрична енергија и за гас, во однос на вештачката интелигенција. Се гради еден гасен интерконектор со Грција, а почнуваме да градиме гасен конектор што ќе ја поврзе нашата држава Србија, објасни премиерот Христијан Мицкоски на прашања поставени на панелот во Давос кои се однесуваа на вештачката интелигенција и потребните центри за гасови, како и тоа што прави Македонија да привлече странски директни инвестиции наспроти Хрватска и Словенија.

„Во однос на вештачката интелигенција ние ги зајакнуваме нашите преносни линии за електрична енергија но не само за електрична енергија, исто така ги зајакнуваме нашите преносни линии со преносните линии за гас. За центрите за податоци, ви е потребно одржливо би рекол, снабдување со електрична енергија. Значи некој мора да произведе одржливо и сигурно снабдување со електрична енергија за центрите за податоци, за да имаат добри, би рекол одлични перформанси на вештачката интелигенција. Во тој поглед градиме еден гасен интерконектор со Грција, а сега почнуваме да градиме гасен конектор што ќе ја поврзе мојата земја со Србија.

Што значи ова? Ќе го зголемуваме капацитетот на гас до осум милијарди кубни метри годишно. Досега трошиме половина милијарди кубни метри годишно, што значи дека илјадници и илјадници мегавати инсталиран капацитет електрани на гас да снабдуваат нови центри за податоци со електрична енергија. Ова е еден столб на еден пример и целиот институционален ризик го прифаќаме како Влада. Ова е нешто што можеме да им го обезбедиме на инвеститорите како поттик“, рече Мицкоски во Давос.

Во моментов се развиваат три важни проекти за производство на електрична енергија од хидроцентралите во вредност од 2 милијарди евра. Овие проекти, информираше премиерот, не се важни само за Македонија туку и за регионот.

„Сега развиваме три големи проект во однос на производство на електрична енергија од хидроцентрали. Зборуваме за проекти од 2 милијарди евра. Тие проекти се многу важни за нас, не само за производство на електрична енергија, туку тие три проекти се и стратешки важни за нас. Но не само за нас, туку и за регионот во целост.

Зборуваме за три големи брани кои ќе создадат три големи резервоари со многу чиста вода за пиење. Имајќи ги предвид климатските промени, мислам дека регионот ќе има потреба од тие резерви со вода за пиење, со чиста вода за пиење. И двата проекта се дел од каскада што се потпира на една голема река, наречена Црна Река. Низводно од таа каскада имаме најдоброто земјоделско земјиште во Европа, а тој регионот е познат како Тиквешки регион.

Практично сме фокусирани на енергијата, а во исто време имаме и други приоритети. Но веројатно сакате повеќе да зборувате за вештачката интелигенција. Исто сакате да се зборувате за електричната енергија и сите оние проекти кои се поврзани некако со тие две многу важни прашања, не само во мојата земја туку и овде во Давос. Многу пати слушаме од политичарите како зборуваат за вештачката интелигенција. Се прашувам дали сите тие можат да ја разберат суштината на вештачката интелигенција или ја користат вештачката интелигенција како популарен збор, како два популарни збора. Го завршив мојот докторат пред 16,17 години и користев алгоритам на фази логика за контрола на манипулативни роботи. Значи, практично тоа беше почетокот на вештачката интелигенција“, подвлече премиерот на панел дискусијата во Давос.

Пратениците на СДСМ поднесоа повеќе амандмани на Предлог-законот за изменување и дополнување на Кривичниот законик.

Како што соопштуваат од партијата, при подготовката на амандманите биле земени предвид аргументите на експертите и на невладините организации изнесени на јавната расправа, како и заложбите на СДСМ за прецизни законски решенија што ќе обезбедат услови за борба против криминалот и корупцијата.

Со амандманите, СДСМ бара измена на членот 353 – „Злоупотреба на службената положба и овластување“ и враќање на решението што важеше пред измените на Кривичниот законик од 2023 година.

„Сегашните измени кај членот 353 ја намалуваат одговорноста кај најважното – тендерите. Ова мора да се промени“, велат од СДСМ.

Партијата бара и целосно бришење на рокот од пет години за конфискација на имот, наведувајќи дека имот стекнат со криминал мора да се конфискува без разлика кога е украден.

„Правдата и украдените пари на граѓаните не смеат да имаат рок на траење“, додаваат од СДСМ.

Со амандманите се предлага и дигиталните податоци и снимки од системот „Безбеден град“ да се бришат во рок од 48 часа.

„Пристап до нив може да има само и исклучиво со судски налог. Не може да се дозволи МВР да го злоупотребува системот и тој да биде партиски инструмент за следење и уцена на граѓаните“, велат од партијата.

Дополнително, СДСМ бара драстично зголемување на казнената политика за секој што се организира во група за вршење тешки кривични дела, со јасно разграничување и максимални казни за мафијашките структури.

Се предлага и зајакнување на кривично-правната заштита на децата од најтешките форми на експлоатација, при што, како што наведуваат, нема место за компромис или благи казни.

„Покрај овие клучни столбови, СДСМ со амандмани бара и проширување на условите за конфискација, за имотот да не може да се сокрие зад туѓи имиња и параван-фирми“, соопштуваат од партијата.