Дваесет и деветгодишен прилепчанец со автомобил удрил во четворица пешаци, од кои двајца малолетни. Едно лице се здобило со тешки повреди.

Според информациите на МВР, вчера во 22:06 часот било пријавено дека во Прилеп на ул. 11 Октомври автомобил „голф“, со прилепски регистарски ознаки, управуван од Б.Т.(29) од Прилеп удрил во пешаците О.С.(37), Б.М.(18) и уште двајца малолетници, сите од Прилеп.

Во несреќата О.С. се здобил со тешки телесни повреди, а останатите пешаци се здобиле со телесни повреди, констатирани во Градската болница во Прилеп. Извршен бил увид од увидна екипа од Полициската станица Прилеп.

Претседателот на избирачкиот одбор на избирачко место 1149 во селото Клечовце, општина Старо Нагоричане, попладнево во полиција пријавил дека во близина на гласачкото место имало штаб на политичка партија на кој имало излепено рекламен материјал од политичката партија и дека пред штабот имало поголема група на граѓани кои агитираат.

Полицијата презема мерки за расчистување на случајот.

Претседателката на гласачкото место 2662 на улицата „Антон Попов“ во скопската полиција пријавила дека околу 12.45 часот, М.П.(36) при остварување на право на глас од четири ливчиња, само едно ставил во гласачка кутија, додека другите ги скинал и ги оставил на пултот за гласање.

За тоа бил известен присутен полициски службеник, по што лицето е лишено од слобода и приведено во полициска станица.

По извршени консултации со јавен обвинител, утврдено е дека постојат основи на сомнение за извршено кривично дело уништување на изборен материјал.