Евроамбасадорот Михалис Рокас рече дека се работи и е во тесна соработка со македонската Влада со цел да се надминат сите преостанати прашања пред отворањето на пристапните преговори за членство во ЕУ.

Тој потврди дека има интензивна дипломатска активност за решавање на прашањето со Бугарија.

„Постојат интензивни дипломатски активности за решавање на прашањето со Бугарија, а во таа насока лидери на Европската Унија ќе го посетат Скопје во следните два-три месеци и се надевам дека ќе можеме да продолжиме напред“, изјави Рокас по поставувањето на камен-темелник на македонско-грчкиот граничен премин Маркова Нога.

Според него, треба да продолжат напорите за имплементирање на реформите предвидени во реформската агенда, усвоена во согласност со планот за раст за Западен Балкан.

Премиерот Христијан Мицкоски во врска со ова прашање изјави дека досега слушнал многу изјави, но дека треба да се гледаат делата.

„Се сеќавам кога високи претставници на ЕУ, придружувани од високи претставници на други земји во светот, седеа пред мене и ми велеа – името е последната работа што треба да го направите. Нормално, ние и тогаш бевме против, но и тогаш им велев дека не ја говорат вистината и дека тоа не е последната работа. Треба да видиме дела, а делата, според мене, претставуваат признавање на пресудите од Судот за човекови права во Стразбур за македонската заедница во Бугарија. Јасно и недвосмислено признавање на многувековниот македонски идентитет, култура, традиција, обичаи и јазик“, посочи Мицкоски.

Според него, ние не сме народ што има проблем со други народи, напротив, ги почитуваме нашите соседи.

„Ако некој има проблем затоа што друг поголем од него му дава совети, а трет тоа го сфаќа како мешање во внатрешните работи на една суверена држава, тогаш ова што го слушаме од страна на нашиот источен сосед, ако не е мешање во внатрешните работи, не знам што е. Ние не сме народ што има проблем со други народи, напротив, ги почитуваме нашите соседи – Албанците, Србите, Грците, Бугарите – но бараме еднакво почитување и за нас Македонците“, нагласи Мицкоски.

Премиерот Христијан Мицкоски, по вчера изгласаните интерпелации за петтемина членови на Судскиот совет што ги назначува Собранието, очекува самите да ги напуштат позициите.

„Јас очекувам најмалку морална одговорност и да ги напуштат позициите што ги имаат заробено бидејќи јасно кажаа парламентарците, тие што ги избраа, дека го изгубија целиот кредибилитет, дека тие повеќе немаат никаков кредибилитет да бидат на тие места каде што се. Тие, впрочем, тоа го докажуваат со изборот на партискиот врховен судија, кој доаѓа од ДУИ и кој е вршителот на должност, знаете како гласаа, не треба тука да објаснувам“, рече премиерот Мицкоски денес на камен-темелникот за граничниот премин со Грција, Маркова Нога.

Собранието вчера изгласа интерпелација за Весна Дамева, Тања Чачарова-Илиевска, Милазим Мустафа, Павлина Црвенковска, Сеилм Адеми и утврди дека тие имале значителен придонес во загрозување на независноста, професионалноста и угледот на судството и придонеле за падот на довербата на граѓаните кон судството.

По акцијата за канцерогениот мазут, во која беа уапсени 11 лица, премиерот Христијан Мицкоски денес рече дека бил шокиран од однесувањето на еден обвинител. Тој не сакаше да ги коментира судските одлуки со кои тројца добија затворски притвор, за едниот од обвинетите беше определен куќен притвор, а на другите седуммина им беа определени мерки за претпазливост, но зборуваше за „првиот човек на едно обвнителство“.

„За мене, алармантни се информациите што ги добивам, а кои се поврзани со однесувањето на прв човек на едно обвинителство кога слушнал за акцијата што ја спроведуваа МВР и БЈПБ пред два дена. Навистина сум шокиран како се однесувал тој човек и како продолжува да се однесува. Мислам дека многу бргу од денеска ќе се кае, но тогаш се плашам дека ќе му биде доцна“, рече премиерот Мицкоски на камен-темелникот на македонско-грчкиот граничен премин Маркова Нога.

Синоќа, Кривичниот суд им одреди 30 дена притвор на бизнисменот Ратко Капушевски – сопственик на фирмата РКМ, на Ерџан Сулкоски и на ексдиректорот на ЕСМ – Адријан Муча, на Асмир Јахоски – сопственик на „Пуцко петрол“ му одреди мерка домашен притвор, а на другите седуммина им одреди мерки за претпазливост. Осомничени се за злоупотреба на тендер за набавка на мазут за потребите на ТЕЦ „Неготино“. Единаесеттемина вчера беа уапсени во акција што се спроведуваше во Скопје, Велес и во Кичево.

Премиерот Мицкоски рече дека ќе почека да заврши истрагата за да даде коментар за тоа дали уапсените ќе одговараат за злоупотреба на службената должност или ќе им се стави на товар и труењето на граѓаните со канцероген мазут.