Изненаден од тоа што седи на обвинителна клупа, поранешниот градоначалник на Кочани, Ратко Димитровски, на денешното судење за трагедијата во кочанската дискотека „Пулс“ побара судот да ја исправи неправдата и да го ослободи оти е единствениот во државата кој пред 13 години побрал да не му се издава лиценца за дискотека на „Пулс“.

По долгиот воведен говор од неговата бранителка Ангела Соколова, во кој таа објасни дека Димитровски побарал од Министерството за економија да не му се издаде лиценца на клубот откога побарле одобрение за паркинг од Општината, а такви услови немало, пред судот збруваше и Димитровски како дополнување на воведниот говор. Објасни дека не дозволил „Пулс“ да ги користи за паркинг двете локации што биле на 250 метри од објектот и веднаш побарал да не му се издаде лиценца, барање на кое никогаш не добил одговор.

„Изненаден сум, никогаш не сум можел да замислам дека ќе застанам на обвинителна клупа за такво нешто, а само јас сум бил тој што е против тоа пред 13 години“, рече поранешниот градоначалник на Кочани, Димитровски, и нагласи дека друго барање од „Пулс“ до него не стигнало.

„Јасно е како ќе сум одговорел имајќи го предвид моето барање за неиздавање лиценца. Сега би требало да седам како јавност, а не обвинет“, рече Димитровски.

Воведен збор даде и одбраната на Николчо Илијев, градоначалник на Кочани во периодот од 2017 до 2021 година, кој има петмина бранители. Воведен збор во име на сите петмина бранители даде адвокатот Синиша Станковиќ, кој укажа дека додека Илијев бил градоначалник, никогаш не дошол во контакт со документ поврзан со клубот. Никој никогаш не го известил или информирал за што било, немал контакт со сопственикот на објектот, ниту со оние што го користеле и не позналавл никого од нив. Ниеден државен орган не го известил за што било за правниот субјект „Пулс“ и немал контакт со другите обвинети лица пред, за време и по функцијата градоначалник.

„Не било поднесено барање за што било до Општина Кочани или до него лично од 2017 до 2021 година ниту по усмен ниту по писмен пат“, рече бранителот Становкиќ и најави дека во постапката ќе покаже оти нема вина кај Илијев, а наведе и дека во речиси половина од неговиот градоначалнички мандат угостителските објекти не работеа поради ковид-пандемијата.

И одбраната на Љупчо Папазов, кој беше градоначалник на Кочани кога се случи пожарот, даде воведен збор на денешното судење. Адвокатот Мите Левков рече дека се работи за конструиран случај во кој треба да се задоволат нечии желби и најави дека ќе докаже оти Папазов не може да има никаква одгворност за пожарот. Рече дека Папазов им се ставил на располагање на институциите ноќта кога се случи пожарот, потсети дека си поднел оставка од функцијата од морални причини и молкум го издржал каменувањето на неговиот дом на 17 март. Неговиот воведен говор го дополни самиот Папазов, кој рече дека досега немал можност, но и не сакал да зборува за да ѝ не пречи на истрагата.

„Сакам само да потсетам за две можности што можев да ги направам во тој момент. Едната од професионален аспект – да ја мобилизирам целокупната општинска администрација во функција на истражните органи, самиот јас да им се ставам на располагање на сите надлежни служби и уште една работа – да го одржам најкраткиот колегиум во мојот градоначалнички мандат со цел овозможување на основните услуги за спроведување на сите потребни активности понатаму. Втората работа што можев да ја направам од личен и човечки аспект од глетката што ја видов – да поднесам оставка од морални причини“, рече Папазов.

Тој најави дека во судницата ќе изнесе многу аргументи и факти, кои можеби нема да му се допаднат некому, но ќе бидат првиот чекор до утврдување на вистината.

Дека чесно си ја извршувале работата и не направиле никакви пропусти, кажаа и тројцата општински градежни инспектори обвинети за трагедијата во „Пулс“, Огњан Георгиев, Љупчо Стаменков и Николчо Гоцев.

Четвртото рочиште на судењето за трагедијата во „Пулс“ е во тек со воведни говори од бранителите на лицата што работеле како обезбедување во дискотеката.

Заменик-претседателот на Владата, Александар Николоски, се обрати на форумот „Прашања на проширување: Новата геополитичка, безбедносна и економска граница на Европа“, што се одржа во Брисел во организација на „Пријатели на Европа“.

Во своето излагање Николоски рече дека земјите од регионот со децении се борат за европските вредности, но дека испораката од Европската Унија недостига. Тој посочи дека Северна Македонија направила низа отстапки, вклучително и промена на името двапати, промена на валутата, знамето и седум измени на Уставот, а во тек е и осмата измена.

„Името го променивме двапати – првин беше за меѓународна употреба: Поранешна Југословенска Република Македонија, потоа моравме да го промениме името за целиот свет, како и за внатре, во земјата, во Северна Македонија. Ги променивме валутата, знамето, Уставот седумпати, сега треба и осми пат. И тоа е бескрајна приказна и кога зборувате со луѓето, тие прашуваат: дали е ова последната работа. И тоа е одговорот што не го добиваме. Сега во комуникација со наши бугарски пријатели и со други засегнати страни ова е нашето главно прашање. Тоа е што е, има договор, не ни се допаѓа, некој друг го потпишал, мораме да спроведеме, но дали е ова последната работа и никој не ни одговара. Прашуваме дали другата страна може да направи нешто за да има некаква рамнотежа и многу често одговорот е – не. Тоа е реалноста, но мислам дека треба да живееме со неа, не треба да кажеме: во ред, се откажуваме“, рече тој.

Додаде дека Северна Македонија продолжува да се трансформира однатре користејќи домашни ресурси и соработка со ЕУ, САД и со Обединетото Кралство. Николоски потсети дека земјата е прва од регионот што потпишала договор за стратешко партнерство со Велика Британија.

Во однос на проширувањето на ЕУ, Николоски оцени дека секое проширување досега било политичко прашање и дека за Западен Балкан недостига политичка волја во Унијата. Тој смета дека е фер земјите членки јасно да кажат што е возможно, а што не, наместо регионот постојано да биде во состојба на чекање.

„Ниедно проширување на ЕУ не било неполитичко, почнувајќи од Грција и Португалија, во претходниот век, па големото проширување на почетокот на овој век, па сѐ до Романија и Бугарија – сѐ било политички. Јасно е дека за овој регион недостига политичка волја. За разни земји причините се разликуваат, но очигледно има недостиг на политичка волја. Сметам дека е фер да им се каже на луѓето од регионот – ова може, ова не може. И ајде да ги правиме работите што може да се направат. Ако може да направиме 10-20 работи, тогаш да ги испорачаме бидејќи вака сме заглавени во ситуација на чекање: следниот самит, следниот самит, јуни, декември, можеби во средината на март… и така времето си минува и она од што се плашам е што може да му се случи на регионот во иднина“, рече вицепремиерот.

Николоски предупреди на ризиците што би ги носело евентуалното пропаѓање на европскиот процес наведувајќи дека во регионот постојат екстремни сили што би можеле да ја преземат моќта. Тој потсети на трагичните искуства од 90-тите и истакна дека политичките елити денес главно се умерени, но дека ваквите сили чекаат простор.

Во говорот тој посочи и на регионалната економска соработка и на инфраструктурното поврзување преку европските коридори 8 и 10 за кои се вложуваат значајни средства во автопатска и во железничка инфраструктура. Николоски истакна дека во моментот трговијата во регионот функционира речиси без граници и оти се работи на олеснување на движењето со Грција и Бугарија.

Тој се осврна и на теориите на заговор присутни во некои од медиумите во регионот наведувајќи пример со реакции по потпишувањето на договорот за железничко поврзување со Бугарија. Според Николоски, единствениот начин да се надмине ваквата состојба е да се испорачуваат резултати.

Во однос на Европската политичка заедница, Николоски оцени дека форумот има потенцијал да ја обедини Европа и дека регионот денес живее подобро отколку пред две децении, и економски и демократски. Но тој нагласи дека постојат нови сили, кои се спротивставуваат на европскиот пат и дека е важно да се зборува чесно со граѓаните.

На крајот, Николоски посочи дека примерите на решавање билатерални спорови меѓу други земји членки, како Словенија и Хрватска, не се применети за Северна Македонија, и повтори дека потребен е фер и јасен пристап на Европската Унија кон регионот.

Операторот за подготовка на храната во основото училиште во Влае, „Димо Хаџи Димов“, е казнета со 900 евра откога беа пронајдени бактерии во мусаката, а во уште едно училиште во општина Карпош се откриени бактерии во намаз.

Инспектори за храна на Агенцијата за храна и ветеринарство (АХВ), по наредените мерки за генерално чистење и дезинфекција на објектот, опремата и машините во кујната во ОУ „Димо Хаџи Димов“, денес, повторно зедоа брисеви од работните површини во кујната со цел утврдување на безбедноста. На вонредни здравствени санитарни прегледи упатени се и вработените во кујната, која ќе остане затворена сѐ до добивање на лабораториските наоди со кои ќе се потврди безбедноста.

АХВ информира дека ги добиле резултатите од лабораториските тестирања на земените мостри храна и брисеви од работни површини, прибор, машини и од вработените лица во кујната во ОУ „Димо Хаџи Димов“ и од вонредните инспекциски контроли што беа спроведени во кујните на 9 основни училишта во општина Карпош со кои стопанисува истиот оператор со храна.

„Со 600 евра во денарска противвредност и 300 евра за одговорното лице казнет е операторот со храна бидејќи од земените мостри храна од ОУ ‘Димо Хаџи Димов’ било потврдено дека послужената мусака не ги задоволува микробиолошките критериуми за безбедност, односно утврдено е присуство на бактеријата Enterobacteriaceae“, соопшти АХВ.

Од земените мостри храна и брисеви во рамките на превентивните вонредни контроли во деветте основни училишта, кај една мостра од храна (намаз) утврдено е присуство на бактеријата ешерихија коли за што е наредено намазот да се исфрли од употреба. Два од тестираните бриса биле позитивни, но кај нив не е утврдено присуство на патогени бактерии.

На операторот со храна за утврдените недоследности со превентивните вонредни контроли изречени му се две парични глоби по 900 евра во денарска противвредност (600 евра за операторот и 300 евра за одговорното лице), а за непоседување сертификат за завршен курс по хигиена за едно лице и немање соодветни технички услови за работа (немање топла вода) во две училишни кујни изречена е и вкупна глоба од 650 евра во денарска противвредност.