Советот на Општина Карпош заседаваше по четврти пат, при што советниците расправаа и полноправно одлучуваа по 10 точки кои се најдоа на денешниот дневен ред. На самиот почеток од седницата, градоначалникот Сотир Лукровски ги информираше советниците во врска со случајот со труење на основците од „Димо Хаџи Димов“.

„По оваа несакана случка, Општина Карпош веднаш презеде серија итни и координирани мерки, за заштита на здравјето и безбедноста на учениците и персоналот во училиштето. Во таа насока, претставници од Општина Карпош од самиот почеток се во постојана комуникација со надлежните институции, поточно со Агенцијата за храна и ветеринарство, Државниот санитарен и здравствен инспекторат, Институтот за јавно здравје и Јавното претпријатие „Водовод и канализација“ – Скопје“ – посочи Лукровски.

Првиот човек на Општината наведе дека надлежните институции во врска со овој случај реагираа веднаш, земајќи примероци од храната, водата и работните површини во училиштето.

„Паралелно со случувањата, Општината обезбеди услови за спроведување на сите превентивни, редовни и вонредни мерки во училиштето, при што на 28 ноември беше спроведена вонредна дезинфекција на целиот училишен објект“ – информираше Лукровски.

Инаку, во текот на минатата недела, Институтот за јавно здравје ја информираше јавноста дека причина за труењето се грам-негативни бактерии од групата Enterobacteriaceae (ЕНТЕРОБАКТЕРИИ), пронајдени во мусаката што ја консумирале децата. Исто така, откриено е присуство на фекални бактерии на три чешми во училиштето. Во исто време, ЈП „Водовод и канализација“ изврши вонредни проверки и земање примероци од училница и кујна. Според нивните резултати, водата во училиштето е санитарно исправна и е во согласност со сите барањата од правилникот за безбедност и квалитет.

„Сакам да ве информирам дека случајот внимателно и посветено го следиме од самиот почеток. Целта ни беше да не шириме паника и да не оставаме простор за ширење на дезинформации и шпекулации, па од тие причини чекаме да добиеме официјални информации од анализите. По добивање на целосниот извештај од надлежните институции кои ги спроведуваат анализите, Општина Карпош ќе ги преземе сите потребни мерки и чекори во рамки на нашата надлежност. Ве уверувам дека безбедноста на децата и нивното здравје се наш апсолутен приоритет и токму поради тоа во иднина ќе продолжиме со засилени хигиенски мерки, инспекциски надзори и унапредување на стандардите во сите основни училишта во Карпош“ – образложи градоначалникот Сотир Лукровски.

Поддршка од советниците доби и дополнителната точка, односно Предлог – Одлуката со која основното училиште „Димо Хаџи Димов“ ја прифаќа донацијата од Владата, поточно од Министерството за животна средина и просторно планирање. Станува збор за донација во вид на прибор за тестирање по природни науки, кој ќе биде ставен на располагање за потребите на учениците и наставниот кадар од оваа училишна установа.

До ден-денес се чудам и не можам да поверувам што се случи таа вечер, изјави првообвинетиот и сопственик на дискотеката „Пулс“ во Кочани, Дејан Јованов, на денешното судско рочиште.

Рече дека цели девет месеци е затворен во четири ѕида.

„Секојдневно ја преживувам таа трагична ноќ“, изјави првообвинетиот Јованов.

Со треперлив глас, на моменти и со солзи во очите, рече дека не може да поверува што се случило таа ноќ.

„Јас како човек и како родител, каде што се собираа сите млади и моите деца, да бидам способен да дозволам нешто да недостига. Зарем сериозно мислите дека, доколку би знаел дека нешто недостига, не би презел сѐ за да се отстрани навреме. Во тој клуб, на тоа место, имаат пораснато десетина генерации. Сите што ме познаваат добро знаат колку и како се грижев за безбедноста на сите гости во клубот. Од срце и од душа сакам да им изразам сочувство на сите фамилии што имаат починати, а на повредените закрепнување. Затоа што ги знам нивната болка и тагата, затоа што и ние во нашата фамилија имаме починат и повреден член и ја носиме истата болка како и вие што ја носите. И уште едно не ми е јасно, зошто Михајло е обвинет бидејќи тој немаше никакви обврски и активности ниту, пак, допирни точки со работата на клубот. Тој си имаше своја фирма за дистрибуција, си ги работеше своите работни обврски со фирмата и си беше нормален гостин како и сите“, рече Јованов.

Тој како и другите обвинети за пожарот во дискотеката „Пулс“ истакна дека не се чувствува за виновен за кривичните дела што му се ставаат на товар,

Неговата бранителка Ивана Коцева во долг воведен говор зборуваше за правни нелогичности и пропусти што ги направило Обвинителството во обвинението, рече дека причина за пожарот е пиротехниката, која без да ја пријават кај Јованов ја внеле и ја употребиле членовите на ДНК.

Коцева рече дека во постапката ќе докаже дека од отворањето на кабарето до трагичниот пожар не можело да постои свест кај Јованов за непреземени мерки за безбедност оти сите служби што имале сознанија не предочиле законски пропусти. Оттука, Коцева смета дека Јованов може да одговара за небрежност и за ништо повеќе. Укажа дека институциите цели 13 години му издавале лиценци откога утврдувале дека ги исполнува условите.

„Тој не бил стручен да препознае недостатоци, институциите немале забелешки“, рече Коцева. Таа се пожали дека како бранителка има тешка задача оти треба да одбрани човек што за сите е убиец, а таа го гледа како човек.

„Дејан е човек, не е монструм“, рече Коцева и нагласи дека во судницата не се дојдени за одбрана на злосторства, туку да дојдат до правдата. Воведниот говор го заврши со зборовите: „Не може да бараме правда, а да ја засноваме на неправда“.

Камерите во Скопје забележале речиси 110.000 прекршоци во сообраќајот за 24 часа. Министерот за внатрешни работи Панче Тошковски рече дека повеќето од нив се однесуваат за пречекорена брзина на возење.

Министерот исто така посочи дека правилата ќе важат за сите, дури и за функционерите, и никој нема да биде поштеден ако направи прекршок. Рече и дека системот „Безбеден град“ има слабости и дека остануваат отворени за секакви решенија што ќе придонесат за намалување на бројот на жртви во сообраќајот.

„Речиси 110.000 за 24 часа само за Скопје, катастрофална бројка. Приближно 1.000 прекршоци се за нерегистрирани возила, речиси 5.000 за поминување на црвено, а најстрашно е што над 90 отсто или повеќе е за пречекорување на брзината“, истакна Тошковски.

Тој уверува дека секој функционер што ќе направи прекршок ќе биде казнет.

„Најодговорно тврдам – ниеден функционер во рамките на редовното вршење на своите јавни работи, ако стори прекршок, ќе биде казнет“, рече тој и додаде дека нема да има селективен пристап за никого и никој нема да биде поштеден.

Министерот исто така рече дека најмалку тројца шофери на министри се веќе казнети, но не сакаше да ги открие имињата на министрите. Појасни дека се казнети со запирање од страна на полициски службеник, а не преку „Безбеден град“.

Во врска со странските возачи, Тошковски рече дека ниту странските возила нема да бидат исклучени.

„При излез од Македонија не може да бидат спречени да излезат во согласност со законот, но ќе бидат информирани дека нема да им биле дозволен влез во Македонија доколку нема да ја платат казната“, рече Тошковски.

Вчера, почна пробниот период на проектот „Безбеден град“, кој ќе трае еден месец, а од 1 јануари 2026 ќе почне и казнувањето.