Полицијата поднесе кривична пријава против десет вработени во АД „Пошта на Северна Македонија“ за проневера во службата и фалсификување службена исправа

Според информациите од МВР, З. Х. (29), Р. И. (34), И. Е. М. (32), С. П. (53), А. Ќ. (45), Ф. Љ. (35), Л. И. (26), М. Т. (62), Н. К. (55) и Х. Х. (42), сите од Скопје, вработени во подружницата во Чаир, од февруари до ноември 2019 година со фалсификување налози од лични трансакциски сметки на физички лица краделе пари.

„Пријавените, деветмина шалтерски работници во посочената подружница, заедно со својот претпоставен, десеттопријавениот Х. Х., во вкупно 26 наврати во временскиот период од февруари до ноември 2019 година со фалсификување 26 налози за исплата – образец ПП40, од лични трансакциски сметки, сопственост на 26 физички лица, депоненти во банка од Скопје, неовластено присвоиле туѓи парични средства кои им биле доверени во вршењето на службата и прибавиле противправна имотна корист за сметка на десеттопријавениот Х. Х. во вкупен износ од 1.570.822 денара“, соопшти МВР.