Претседателот на Украина, Володимир Зеленски, при пристигнувањето во главниот град на Велика Британија, Лондон, изјави дека американската поддршка е од клучно значење за Украина.

Предвидено е Зеленски денеска да има средба со Кир Стармер, а утре да присуствува на средбата организирана од британскиот премиер со повеќе европски лидери, на која ќе се разговара за идниот мировен договор за Украина и негово спроведување.

Зеленски пристигна во Лондон од САД, каде синоќа имаше вербален судир со американскиот претседател и потпретседател, Доналд Трамп и Џеј Ди Венс. Поради што беше откажана заедничката прес-конференција и не беше потпишан договорот за експлоатација на украинските минерални ресурси, според кој приходите од минералите ќе бидат депонирани во заеднички американско-украински фонд, а за возврат Украина да добие американски безбедносни гаранции.

Министерот за внатрешни работи Панче Тошковски денеска информираше дека со максимално интензивирање на сите ресурси во изминатите дваесетина дена во главниот град, сообраќајните незгоди со тешки телесни повреди се намалени за околу 30 проценти, а сообраќајните незгоди со телесна повреда за околу 24 проценти. Вкупниот број на сообраќајни незгоди, како што изјави Тошковски, е намален за околу 13 отсто споредено со минатата година.

Полициските контроли во главниот град се интензивирани по смртта на 22-годишната Фросина Кулакова која на 29 јануари загина на пешачки премин на булеварот „Партизански одреди“.

Според Тошковски, кога ќе има постојан видео надзор, секој граѓанин кој ќе направи прекршок, ќе биде детектиран и казнет и секој ќе ги почитува сообраќајните правила.

– Не е целта да се казнуваме, туку да немаме луѓе коишто гинат на улица, подвлече Тошковски.

Претседателот на САД, Доналд Трамп, би можел да ја укине помошта за Украина, тврди неименуван извор од Белата куќа за весникот Њујорк Тајмс. 

По прекинатата средба со украинскиот претседател Володимир Зеленски во Белата куќа, Трамп размислува да ја укине целата американска помош за Украина, вклучително и испораката на муниција и опрема, кои беа одобрени и платени за време на мандатот на поранешниот претседател Џо Бајден.

Тој исто така наведе дека Трамп би можел да ја стопира и индиректната помош за Украина, што вклучува различни форми на воено финансирање, разузнавачка соработка, обука на украински војници и пилоти, како и функционирањето на меѓународниот центар за управување со помош во американската воена база во Германија.

Европските држави досега ѝ доделиле на Украина помош во вредност од 138 милијарди долари, додека американската воена и хуманитарна помош изнесува 119 милијарди долари.

По расправијата со украинскиот претседател, Трамп изјави дека Зеленски не ги почитува САД и дека не е подготвен за мир.

Зеленски, пак, по напуштањето на средбата во Белата куќа, изјави дека го почитува Трамп, но дека не гледа причина да му се извини.

„Го почитувам претседателот и го почитувам американскиот народ… Мислам дека мораме да бидеме отворени и искрени. Не сум сигурен дека направивме нешто лошо“, изјави Зеленски.

Тој додаде дека Трамп не е во право кога тврди дека тој не сака да потпише договор со рускиот претседател Владимир Путин, но истакна дека Украина мора да биде во посилна позиција пред било какви преговори.

Според Зеленски, Украина ќе се соочи со сериозни предизвици во одбраната од Русија без американска поддршка, но изрази надеж дека неговиот однос со Трамп може да се подобри.

Трамп, пак, по средбата ја исклучи можноста за брзо продолжување на разговорите со Зеленски, тврдејќи дека украинскиот претседател не е искрен во својата намера да постигне мир.

„Па, тој сега вели дека сака мир. Сака веднаш да се врати, но јас не можам да го направам тоа“, изјави Трамп.

Дополнително, по прекинатата средба во Белата куќа, не беше потпишан договорот за експлоатација на украинските минерални ресурси, според кој приходите од минералите требаше да бидат депонирани во заеднички американско-украински фонд, а за возврат Украина да добие американски безбедносни гаранции.