Основниот кривичен суд Скопје донесе пресуда со која напаѓачот на градоначалничката на Скопје, Данела Арсовска, е осуден на две години затворска казна поради нападот врз неа.

„Основниот кривичен суд Скопје известува дека судот на 2.9.2025 година ја донесе и јавно ја објави пресудата по предметот К.бр.1338/25, со која обвинетиот С. Љ. го огласи за виновен за сторено кривично дело насилство од член 386 став 3 вв со став 1 од Кривичниот законик по што му изрече казна затвор во траење од 2 (две години), а поради тоа што на 11.7.2025 година извршил грубо насилство врз градоначалничката на град Скопје.

Во согласност со член 47 од Кривичниот законик, во изречената казна затвор на обвинетиот С. Љ. му се засметува и времето поминато во куќен притвор, преиначена во мерка притвор.

Против ваквата пресудата странките имаат право на жалба во рок од 8 (осум) дена по приемот на пресудата преку овој суд до Апелациониот суд Скопје“, се истакнува во соопштението.

Во однос на мерката притвор, судот одлучи дека таа да се продолжи до правосилност на пресудата, односно до почнување со издржување на казната затвор, но не подолго од 60 (шеесет) дена.

Претседателот на СДСМ, Венко Филипче, денес одговори на прашањето во врска со наводите за следење на премиерот и други функционери, нагласувајќи дека јавноста заслужува одговори и транспарентност.

„Дозволете да коментирам на линија на секој мој коментар кога станува збор за таква работа. Прво очекувам да има објективно прикажување на работите, фактите да се знаат во јавноста. Доколку е потребно да има истрага и да биде задоволена правдата. Ние во изминатиот период видовме многу најавени скандали, бомбастично од одредени портали, од партиската говорница на ВМРО-ДПМНЕ коишто немаа никаква разрешница. Да ве потсветам имаше најава некаква за поткуп на премиерот, понатаму дека бил следен со дронови, понатаму дека ќе има дестабилизација и еве сега некакво следење. Денеска има изјава и од поранешниот директор на Агенцијата за национална безбедност, и тој самиот вели, еве, барем нека се декласифицираат информацијата, па да видиме каква е вестината. За да нема лов на вештерки, лов на вештерки, лов во матно мислам дека граѓаните јавноста го заслужуваат тоа, рече Филипче.

СДСМ повикува институциите да постапат одговорно и да ги обелоденат сите релевантни информации, за да не се злоупотребува безбедносниот систем во политички цели и дневни пресметки.

Поранешниот градоначаник на Скопје, Ристо Пенов, и актуелниот советник во Град Скопје од ЛДП и епидемиолог, Никола Пановски, се главни фаворити од партијата за кандидат за градоначалник и носител на листа за Скопје од редовите на ЛДП.

Оваа одлука, неофицијално, била донесена на вчерашната седница на Централниот одбор на партијата, каде што мнозинството гласови одлучиле во трката да се приклучат овие партиски кадри.

Ристо Пенов е познат на јавноста како искусен политичар, кој беше градоначалник на Скопје во два мандата, од 1996 до 2005 година, период во кој иницира и реализира повеќе значајни инфраструктурни и урбани проекти во главниот град. Познат е по својот умерен и принципиелен стил на политичко дејствување.

Никола Пановски, еден од водечките експерти во областа на јавното здравство, стана пошироко препознатлив по своите стручни ставови и анализи за време на пандемијата на ковид-19, при што јавно укажуваше на проблемите во здравствениот систем. Во последните години е активен и во политичкиот живот како член на Советот на Град Скопје, каде што настапува критички и со барања за отчетност и одговорност во управувањето со градот.

Освен Пенов, Либерално-демократската партија (ЛДП) во текот на годините имаше повеќе истакнати кадри, кои остварија значајни успеси на локалните избори, особено во Скопје и некои од општините во државата, како што беа Андреј Жерновски во Центар, Стевче Јакимовски во Карпош, Аце Коцевски во Велес, Марјан Костадинов во Виница и многу други локални политичари, кои оставиле трага во локалната политика во Македонија.