Момче на возраст од 22 години се товари дека уценувало своја 26-годишна познаничка дека ќе објави компромитирачки фотографии од неа, со што ја присилил да му даде околу 200 евра.

Како што информираат од МВР, 22-годишникот првично побарал 500 евра и со порака и се заканил на девојката дека на „Фејсбук“ ќе објави компромитирачки материјал, доколку не му ги даде парите за да го плати адвокатот во врска со кривична пријава, што таа ја поднела против него, за нанесени телесни повреди.

Девојката го пријавила настанот во полициска станица, по што бил известен и јавен обвинител, по чии насоки биле преземени мерки за расчистување на случајот.

Така, на 26 јануари во угостителски објект на улица „Христо Татарчев“, по претходен договор, пријавениот се сретнал со оштетената која му дала 200 евра.

Кратко потоа на истата локација, полициски службеници го уапсиле момчето.

Против 22-годишникот, жител на селото Орешани, е поведена постапка за сторено кривично дело уцена.

Надлежниот јавен обвинител до судот доставил предлог за определување мерки на претпазливост: забрана за напуштање на живеалиште, обврска повремено да се јавува кај надлежен државен орган, привремено одземање на пасош, како и забрана за приближување или одржување контакти со оштетената.