Денеска во 09:45 часот полициски службеници од Секторот за меѓународна полициска соработка во содејство со полициски службеници од ОВР Струга го лишија од слобода 30-годишниот С.Р..

Лицето било барано со централна потерница од Основен суд Скопје за издржување на казна затвор во времетраење од пет години по чл.130 од Кривичниот законик.

Вчера во 16:50 часот на патарина „Петровец“ во Скопје, полициски службеници го лишија од слобода М.А.(28) од Босна и Херцеговина поради постоење основи на сомнение за сторено кривично дело по член 268 од Кривичниот законик.

Имено, тој на патарината поминал со товарно возило со босански национални ознаки и притоа платил со банкнота од 10 евра за која вработениот се посомневал дека е фалсификувана.

Банкнотата е одземена за понатамошна постапка. Тој е задржан во полициска станица и по целосно документирање на случајот ќе следува соодветна пријава.

Полициските службеници од СВР Охрид во текот на 14 и 15 октомври привеле неколку лица поради нарушување на јавниот ред и мир и агресивно однесување.

На булеварот „Македонски просветители“ е приведен 53-годишен охриѓанец кој се однесувал агресивно и лажно пријавил дека бил физички нападнат. Кај него биле измерени 1,51 промили алкохол.

На улица „Партизанска“ полицијата привела 42-годишен маж кој прво правел неред во продавница, а потоа физички се спротивставил на обезбедувањето. Алкотестот покажал 3,52 промили.

Во селото Лескоец се приведени двајца лица, на возраст од 34 и 46 години, поради меѓусебна физичка пресметка пред продавница. Кај нив биле утврдени 2,30 и 2,46 промили алкохол.

Против сите лица ќе бидат поднесени соодветни пријави по целосно документирање на случаите.