Основното јавно обвинителство за гонење организиран криминал и корупција, постапувајќи по кривичната пријава поднесена од страна на СВР Штип, донесе наредба за истражна постапка против четири лица, од кои тројца косовски и еден македонски државјанин.

Како што информираат од Обвинителството, постои основано сомнение дека осомничените сториле кривично дело неовластено производство и пуштање во промет наркотични дроги, психотропни супстанции и прекурсори.

„Осомничените во текот на март оваа година неовластено организирале, заради продажба набавиле, држеле и пренесувале наркотична дрога, марихуана со вкупна тежина од 88.150 грама, од Р. Косово до с. Никуштак, Кумановско, а потоа до Штип, со намера дрогата да биде пренесена до Р. Турција како крајна дестинација. Косовските државјани, откако неовластено ја набавиле наркотичната дрога и на засега неутврден начин неовластено ја пренеле на територијата на РС Македонија, ја сместиле на засега неутврдена локација во с. Никуштак. Потоа организирале и го ангажирале четвртоосомничениот дрогата неовластено да ја пренесе до Штип, од каде што понатаму требало да се транспортира до Р. Турција. За таа цел, осомничените косовски државјани, напладне, на 30 март, на граничниот премин Блаце, со возило со германски регистарски таблички, оствариле легален влез во земјата по што се сретнале со четвртоосомничениот во близина на рафинеријата ‘Окта’ и му дале насоки со возило неовластено да ја пренесе марихуаната од с. Никуштак до Штип.

Четвртоосомничениот со патничко моторно возило со кумановски регистарски таблички се упатил кон с. Никуштак, од каде што во близина на тамошното училиште се сретнал со повеќе лица, од кои ја презел марихуаната. Откако ја сместил дрогата во багажниот простор и на задните седишта во возилото, се упатил кон Штип, каде што се паркирал на паркинг пред угостителски објект. Во исто време пристигнале и тројцата косовски државјани, двајца од нив се упатиле кон паркингот, а третиот со патничкото моторно возило заминал кон Скопје, од каде што подоцна на граничниот премин Блаце ја напуштил територијата на РС Македонија.

Во меѓувреме, полициските службеници ги забележале тројцата осомничени околу возилото на паркингот и им дале знак да застанат. Двајцата косовски државјани не ја почитувале наредбата и се дале во бегство, но набргу биле совладани од страна на полициските службеници, па сите тројца затекнати осомничени се лишени од слобода. При прегледот на возилото биле пронајдени вкупно 92 полиетиленски пакувања со растителна материја за која со вештачење е утврдено дека е марихуана во вкупна количина од 88.150 грама.

Тројцата приведени осомничени беа изведени пред судија на претходна постапка при Основниот кривичен суд Скопје. Обвинителот, ценејќи дека се исполнети условите предвидени во Законот за кривичната постапка, поднесе предлог за определување мерка притвор против сите осомничени лица. Предлогот беше прифатен од страна на судијата на претходна постапка при Основниот кривичен суд Скопје и на осомничените со решение им определи мерка притвор во траење од 30 дена. Мерката притвор е определена и за третоосомничениот и таа ќе се применува по неговото пронаоѓање“, се наведува во соопштението на Обвинителството.

Од таму додаваат дека акцијата била резултат на претходна меѓуинституционална меѓународна размена на информации на служби за борба против дрога и Одделот за криминалистичка полиција во координација со надлежниот јавен обвинител.

Во меѓувреме, МВР продолжува со преземање намерки за пронаоѓање на засега непознато лице, кое со товарно возило требало да ја преземе марихуаната од Штип и да ја пренесе до Турција.