Кавадарчанецот што во јуни годинава избоде жена на нива во прилепско село ќе одговара за обид за убиство и за противправно лишување од слобода. Според информации од велешкото Обвинителство, кавадарчанецот со возило ја одвел жртвата на нива, каде што ја избол со нож. По неколку часа, ја одвел во куќа и ја оставил таму раскрвавена. По еден ден, со такси-возило ја однел во селото Сопот, каде што ја исфрлил од возилото. Жената била во бесвест.

„На обвинетиот кавадарчанец на возраст од 37 години му се става на товар дека на 6 јуни годинава најпрвин по телефон ја повикал оштетената да му се придружи на патувањето за Прилеп. Таа прифатила и обвинетиот ангажирал такси-возило, но, наместо кон Прилеп, се упатиле во правец на село Бегниште. Кога дошле до крајот на селото, тој ѝ рекол на оштетената да излезат од возилото и продолжиле да се движат пеш по блиските ниви. Во еден момент обвинетиот извадил нож и со него ја пробол оштетената во стомакот од десната страна под градниот кош нанесувајќи ѝ со тоа тешка телесна повреда со конкретна опасност по животот. Потоа си заминал оставајќи ја оштетената сама“, велат од Обвинителството.

По неколку часа тој се вратил и со помош на лице, кое сега е сведок во постапката, ја однел во неговата куќа и таму ја оставил, иако жената имала болки и крвавења и го молела да ја однесе на лекар. Со ваквите дејства, велат од Обвинителството, тој противправно ѝ ја ограничил слободата на движење.

Тој се вратил во куќата утредента, на 7 јуни, и на инсистирање и молба од оштетената со такси ја однел до село Сопот, во близина на куќата на нејзините баба и дедо, ја исфрлил од такси-возилото во бесвесна состојба и таму ја оставил.

Истовремено, со обвинителниот акт доставен е предлог за продолжување на мерката притвор за обвинетиот бидејќи, како што велат од Обвинителството, сè уште постојат основите поради кои тој е определен.

„Обвинетиот е пријател на оштетената и кривичното дело го сторил искористувајќи ја нејзината доверба и пријателство, што претставува околност која го оправдува стравот дека тој би можел да го повтори кривичното дело. Исто така, по извршувањето на кривичното дело, обвинетиот се криел во повеќе градови низ Македонија, честопати го менувал своето престојувалиште, што упатува на можност тој да се даде во бегство доколку биде на слобода. Во рамките на истражната постапка Обвинителството ја испитуваше евентуалната кривична одговорност и на други инволвирани лица, но до овој момент не се пронајдени докази што упатуваат во таа насока“, велат од Обвинителството.