Кумановско-Осоговската епархија при Македонската православна црква – Охридска архиепископија (МПЦ-ОА) во саботата пријавила во Полициското одделение Матејче дека манастирот „Успение на Пресвета Богородица“ во село Матејче, општина Липково, бил мета на вандализам и кражба.

Според пријавата, непознати сторители во текот на месецов насилно влегле во објектот, кој е под заштита на државата како културно богатство, користејќи физичка сила и погоден алат. При тоа, тие извршиле ископување на подот, а притоа биле извадени и осквернавени посмртни останки на погребани лица.

Освен вандализмот, од централната манастирска црква бил украден и оловен лим.

По пријавата, на местото бил извршен увид од страна на надлежен јавен обвинител и увидна екипа од СВР Куманово. Од полицијата информираат дека се преземаат мерки за расчистување на случајот и пронаоѓање на сторителите.

Попладнево на регионалниот пат А3, Битола-Ресен кај местото викано Макази се случи сообраќајна несреќа во која загина 46 – годишен маж од ресенско село.

Од СВР Битола информираат дека во сообраќајната несреќа учествувале патничко моторно возило марка „БМВ” со ресенски регистарски ознаки управувано од 46 – годишен жител на ресенско село кој удрил во патничко возило марка „Пежо” со битолски ознаки, а потоа патничкото возило „Пежо“ удрило во друго патничко возило марка „БМВ” со ресенски ознаки управувано од 47 – годишен жител на ресенско село со кого бил и сопатник. Од ударот на лице место починал 46 – годишниот возач на „БМВ”, а смртта ја констатирал лекар од Итна медицинска помош Ресен.

Возачот и сопатникот во другото возило „БМВ” се пренесени во Клиничка болница Битола за укажување на лекарска помош.

Регионалниот пат од м.в.Макази до селото Ѓавато е пренасочен по стариот пат, потврдија за МИА од СВР-Битола.

Обвинетиот Валмир Етеми кој е организатор на криминална група за трговија со дрога и оружје во охридско-струшкиот регион, кој беше во бегство, беше екстрадиран, но сега е пуштен од притвор откако Скопскиот Апелационен суд ја прифати неговата жалба.

Судот го прифатил предлогот за гаранција во висина од над 600.000 евра, обезбедена со хипотека на недвижен имот. Покрај тоа, му се определени и мерки на претпазливост, вклучувајќи редовно јавување на суд и одземање на патната исправа.

Скопскиот Апелационен суд објави дека за утре ќе дадат повеќе информации за образложението по кое ја прифатиле жалбата на обвинетиот, а го пуштиле на слобода, иако обвинителството за организиран криминал веќе испрати негативно мислење за пуштање на обвинетиот, наведувајќи неколку важни причини.