Во 3 часот по полноќ на подрачјето на Ѓорче Петров полициски службеници ги приведоа А.Ч.(18) и 16-годишна малолетничка, двете од Скопје, поради тоа што агресивно се однесувале кон полициски службеници кои извршувале службени дејствија, соопшти МВР во дневниот полициски билтен.

По целосно документирање на случајот ќе следува соодветен поднесок.

Вчера околу 13:43 часот, пред угостителски објект во Струга, две лица со остри предмети го нападнале Д.Н. од струшкото село Велешта, при што тој добил убодни рани по телото.

Повредениот веднаш бил префрлен во Општата болница во Струга каде му била укажана медицинска помош. На местото на настанот извршен е увид од јавен обвинител и полициски екипи.

Полицијата информира дека по целосно расчистување на случајот против напаѓачите ќе бидат поднесени соодветни пријави.

Скопското Обвинителство донесе наредба за спроведување истражна постапка против 28-годишна жена осомничена за обид за убиство. Пред два дена, во домот на улицата Борис Бојаџиски во скопската населба Ѓорче Петров, таа се обидела да ја убие бабата на својот сопруг со која живееле во семејна заедница.

Додека бабата, родена 1938 година, одмарала во една од собите, осомничената ја заклучила вратата, седнала врз неа и со перница врз главата се обидела да ја задуши. Таа исто така ја удирала со тупаници по главата.

Според информациите од Обвинителството, престанала кога мислела дека ја убила и за тоа му кажала на сопругот. Тој веднаш повикал полиција.

Бабата била пренесена во болница, каде и биле констатирани нагмечување на главата и вилицата, како и хематоми.

До судот доставен е предлог за определување мерка притвор.