СВР Струмица, до Основното јавно обвинителство Струмица, поднесе кривична пријава против З.Г.(57) од Струмица поради постоење основи на сомнение дека во десет наврати сторил кривично дело „злоупотреба на службената положба и овластување“.

Пријавениот, во својство на директор на Јавното претпријатие „Комуналец“ Струмица, на 04.08.2020 и 13.10.2021, без да биде направена соодветна анализа согласно Правилникот за плати и други надоместоци на плата на јавното претпријатие и спротивно на законската регулатива, донел решенија за додаток на плата, при што му биле исплаќани по 9.000 и по 6.000 денари месечно, додаток на плата, се до престанокот на неговиот мандат во 2024 година. На тој начин тој се стекнал со противправна имотна корист од 552.520 денари.

Исто така, во текот на септември и октомври 2021 година, пријавениот донел уште седум идентични решенија за седум други вработени лица во Јавното претпријатие и им биле исплаќани по 6.000 денари месечно до месец март 2022 година, со што се стекнале со противправна имотна корист од 276.000 денари.

Додека, пак за едно вработено лице, пријавениот донел решение за додаток на плата заради прилагодување кон пазарот на трудот, за што биле исплаќани по 6.000 денари месечно се до месец март 2022 година и на тој начин се стекнало со противправна имотна корист од 36.000 денари.

Со таквите дејствија, пријавениот го оштетил буџетот на ЈПКД „Комуналец“ Струмица во вкупен износ од 864.520 денари.

Вчера во 11:00 часот во Тетово, полициски службеници од СВР Тетово го приведоа 47-годишниот И.Џ. од Тетово, кој бил баран по потерница врз основа на судска наредба за издржување на казна затвор во траење од 15 месеци за сторено на кривично дело „неовластено производство и пуштање во промет наркотични дроги, психотропни супастанци и прекурзори“ по член 215 од Кривичниот законик.

Тој е спроведен во Казнено – поправната установа Затвор Скопје за издржување на казната.

Вчера во 21:00 часот на регионален пат Тетово – Скопје, на влез за село Желино, тетовско, полициски службеници од Полициската станица за безбедност на патниот сообраќај Тетово ги лишија од слобода 37-годишниот Б.А. и 26-годишниот О.Ј., двајцата од село Требош, тетовско.

При преглед кај нив и во патничкото моторно возило „ауди“ со тетовски регистарски таблички, кое го управува Б.А., пронајдени и одземени се шест ќеси со марихуана.

Тие се задржани во полициска станица и по документирање на случајот против нив ќе биде поднесена соодветна пријава.