Црна хроника
Маж и жена од Бугарија измамиле скопјанка за 8.000 евра, предложен притвор

Јавен обвинител од Основното јавно обвинителство Скопје поведе постапка против маж и жена, државјани на Република Бугарија за кои постои основано сомнение дека сториле кривично дело измама од член 247 став 3 во врска со став 1 во врска со член 22 од Кривичниот законик.
Двајцата соизвршители, со намера за себе да прибават противправна имотна корист, со прикажување лажни факти преку телефонски разговор довеле во заблуда една оштетена со живеалиште во општина Аеродром, на која во два наврати ѝ зеле вкупен износ од 8.000 евра. Користејќи се со измама и презентирајќи лажни факти, осомничените ја навеле оштетената првиот пат да им даде 5.100 евра, а потоа уште 2.900 евра.
Со оглед на тоа што осомничените се странски државјани без регулиран престој во земјава, па постои висок ризик да се дадат во бегство за да го избегнат кривичниот прогон, јавниот обвинител до судијата на претходна постапка од Основниот кривичен суд Скопје достави предлог за определување мерка притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Топ
Силувани деца на возраст од 3 и 10 години во Гостивар, мајката ги снимила и видеото го пратила на таткото

Основното јавно обвинителство Гостивар донесе Наредба за спроведување истражна постапка против мајка од гостиварско за која постои основано сомнение дека спрема нејзините две деца – девојче родено 2015 година и момче родено 2022 година, сторила кривично дело – Запуштање и малтретирање дете.
Како што информираат од обвинителството таа исто така се сомничи и за – Производство и дистрибуција на детска порнографија, додека две други жени се осомничени за – Силување на децата кои не наполниле 15 години.
Триесетгодишната мајка грубо ја запоставила својата должност за грижа за децата и дозволила двете 22-годишни жени да извршат полови дејствија со нејзините деца. За тоа време, мајката настанот го снимала со мобилен телефон, а видеото со детска порнографија преку апликација ја испратила на нејзиниот сопруг кој се наоѓал во Италија.
Јавниот обвинител до судијата на претходна постапка од Основниот суд во Гостивар достави предлог за определување мерка притвор за трите осомничени.
Црна хроника
Македонски државјанин кој летувал во Саранда најден починат во стан

Македонски државјанин е пронајден без знаци на живот во стан каде што престојувал на одмор, во крајбрежниот албански град Саранда.
Трагичниот настан, според полицијата, се случил на 26 јули, во населбата број 1 во градот.
-Полицијата во Саранда објави дека жртвата, идентификувана како О. Ј. (20), била пронајдена од членовите на неговото семејство додека бил во станот каде што престојувал за време на престојот во Албанија, објавија медиумите.
Прелиминарниот преглед на телото не открил никакви траги на насилство. Се сомнева дека младиот човек починал од природна смрт, но обдукцијата треба да ја потврди причината.
Властите продолжуваат со истрагата за да ги разјаснат сите околности на овој трагичен настан.
Ова е втор трагичен крај на македонски државјанин, за време на престој во Албанија.
Во средината на овој месец во близина на Драч, на плажата кај Каваја, се удави 66- годишен македонски државјанин.
Црна хроника
Мотоциклист тешко повреден во сообраќајка кај „Борис Трајковски“ во Скопје

Мотоциклист се здобил со тешки телесни повреди, а друг возач е полесно повреден во сообраќајна несреќа што се случила вчера околу 13:05 часот на крстосницата меѓу булеварот „Борис Трајковски“ и улицата „Трајко Иванов Љузе“ во Скопје.
Како што информираат од СВР Скопје, во несреќата учествувале патничко возило шкода, управувано од 61-годишниот П.Б. од Скопје и мотоцикл јамаха, со кој управувал 28-годишниот М.С., исто така од Скопје.
По судирот, мотоциклистот М.С. се здобил со тешки телесни повреди, кои му биле констатирани во Комплексот клиники „Мајка Тереза“. Возачот на автомобилот П.Б. е полесно повреден и бил пренесен во Градската општа болница „Св. Наум Охридски“.
На местото на несреќата излезе јавен обвинител и увидна екипа од СВР Скопје, а истрагата за причините продолжува.