Случајот во кој четворица малолетници насилно се однесувале кон малолетник во Струмица, а потоа настанот го објавиле на социјалната мрежа Тик Ток, е расчистен и ќе биде поднесен соодветен поднесок.

На 06.11.2025 во полициската станица Струмица, 42-годишен маж од струмичко пријавил дека пред околу една недела неговиот малолетен син бил жртва на насилно однесување од страна на четири малолетни лица, кое било снимано и објавено на Тик Ток.

По пријавувањето, полициски службеници од СВР Струмица презеле мерки за расчистување на настанот. Инволвираните малолетници биле повикани во полициската станица, каде се извршени службени разговори во присуство на нивните родители.

Јавен обвинител од Основното јавно обвинителство Струмица и Центарот за социјални работи Струмица биле запознаени со случајот. По целосно документирање, ќе биде поднесен соодветен поднесок по Закон за правда за децата.

Во неколку одделни контроли спроведени во текот на ноќта на 7 и 8 ноември, полициските службеници привеле пет лица кои управувале возила под дејство на алкохол.

Во Валандово, на 08.11.2025 околу 02:53 часот, полициски службеници од СВР Струмица – ОВР Валандово го привеле В.М.(49) од Валандово, откако при контрола на патничко возило фолксваген со гевгелиски регистарски ознаки било утврдено дека возачот има 1,82 промили алкохол во крвта.

Во Битола се регистрирани три случаи. На булеварот „1 Мај“, во 03:05 часот, приведен е Ф.Д.(26) од с. Цапари, кој управувал опел со 1,69 промили алкохол. На ул. „Македонска фаланга“ во 01:16 часот е лишен од слобода Љ.В.(57) од Битола, кој возел фиат со измерени 1,98 промили алкохол. Претходно, на 07.11.2025 во 23:12 часот на ул. „Тошо Даскало“, приведен е Н.С.(36) од Битола, кој управувал пасат со 1,79 промили алкохол.

Во Кочани, на ул. „Теодосиј Паунов“, на 08.11.2025 околу 01:40 часот, полициските службеници од ОВР Кочани го лишиле од слобода С.С.(32) од с. Оризари. Тој управувал волксваген поло со 1,52 промили алкохол во крвта.

Од МВР информираат дека по целосно документирање на случаите ќе бидат поднесени кривични пријави за „безобѕирно управување со моторно возило“ по член 297-а од Кривичниот законик.

Одделот за внатрешна контрола, криминалистички истраги и професионални стандарди при Министерството за внатрешни работи до Основното јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворската полиција поднесе кривична пријава против Ф.Н., полициски службеник во Одделението за криминалистичка полиција при СВР Тетово, поради постоење основи на сомнение за сторено кривично дело ,,попречување на правдата“, предвидено и казниво по член 368-а став 8 од Кривичниот законик.

Пријавениот, како дежурен криминалистички техничар за криминалистичка регистрација на 04.10.2025, преземајќи службени дејствија во настан во кој две лица биле лишени од слобода поради постоење основи на сомневање за сторено кривично дело „неовластено производство и пуштање во промет на наркотични дроги, психотропни супстанции и прекурсори“ по член 215 од КЗ, му овозможил на полицискиот службеник О.С., кој на наведениот датум не бил работно ангажиран, а е родител на едно од лицата лишени од слобода И.С., да има целосен увид во службената документација, да располага со неа, да ја пренесува од една во друга просторија, да ги придружува лицата лишени од слобода во постапката за прибирање на биолошки траги и да земе примероци од урина од истите. По извршено вештачење на примероците од урината е потврдено дека примерокот од урина од И.С. всушност било урина дадена од неговиот татко, полицискиот службеник О.С..

Со наведените дејствија пријавениот Ф.Н. имал намера да ги уништи доказите и да го спречи и отежне докажувањето во постапката. Одделот за внатрешна контрола, криминалистички истраги и професионални стандарди против Ф.Н. ќе поднесе предлог за поведување на постапка за утврдување на дисциплинска одговорност и ќе изрече задолжителна мерка отстранување од работното место – суспензија.