Вчера во 19.55 часот во село Лавци, битолско, полициски службеници од СВР Битола ги лишија од слобода 33-годишниот М.К., 38-годишниот Д.П. и 36-годишниот Д.М., сите од Битола.

При претрес во домот на М.К.(33) во село Лавци, извршен со судска наредба, во кој беа затекнати и Д.П. и Д.М., пронајдени и одземени се дигитална вага со остатоци од марихуана, семки од растението канабис, 41 стаклена тегла со изртена габична материја, тегли, шишиња и шприцеви исполнети со течност, импровизирани саксии со растението канабис и други предмети за кои постои сомнение дека потекнуваат од кривично дело.

По документирање на настанот, против лицата ќе бидат поднесени соодветни пријави.

Матурант од Струмица во текот на вчерашниот ден бил најден мртов на нива.

Се работи за 19-годишно момче со иницијали М.А., а според информациите од полицијата, телото било најдено на 19 мај во 12.05 часот.

„Лекарот констатирал смрт без видливи траги на насилство“, информираа од СВР Струмица за „Макфакс“.

Извршен е увид, а телото е дадено на обдукција.

Вчера во Полициската станица Радовиш е извршен службен разговор со 21-годишниот А.А. од село Злеово, радовишко, кој претходно беше приведен поради учество во физичка пресметка со уште три лица во село Злеово.

Во разговорот тој признал дека во периодот од јануари до мај 2025 година на подрачје на Радовиш извршил една „тешка кражба“ и едно „одземање на моторно возило“, а извршил и две кривични дела „одземање на моторно возило“ на подрачје на Струмица.

Од него се одземени предмети кои потекнуваат од извршените кривични дела, запознаен е јавен обвинител од Основното јавно обвинителство Радовиш и по документирање на случајот против него ќе биде поднесена соодветна пријава.