Царинската управа, во соработка со Министерството за внатрешни работи, спречи уште еден обид на шверцување наркотични дроги. На аеродромот „Скопје“ запленети се речиси 2 килограма кокаин.

На 5 декември, околу 20.30 часот, со летот од Цирих, на влез во Република Македонија селектиран е и детаљно прегледан патник државјанин на Република Венецуела. При прегледот во неговиот багаж пронајдени се околу 2 килограма бела прашеста материја, која при проверка со тестер за дрога дала позитивен резултат за присуство на cocaine hydrochloride, што индицира дека непознатата растителна материја е наркотична дрога кокаин.

По преземање на случајот од страна на инспекторите од одделението за истраги при Царинската управа, а по наредба на јавен обвинител, непознатата прашеста материја е доставена на вештачење, со што е утврдено дека станува збор за кокаин.

Вредноста на запленетата дрогата на црниот пазар во Република Македонија изнесува околу 140.000 евра, а таа при продажбата на мало би била повеќекратно зголемена и би достигнала вредност околу 570.000 евра.

Царинската управа на Република Македонија до надлежното Основно јавно обвинителство против осомничениот поднесе кривична пријава поради постоење основано сомнение дека сторил кривично дело неовластено производство и пуштање во промет наркотични дроги, психотропни супстанции и прекурсори.