Во Кавадарци е одржан протест поради смртта на Фросина.

Нејзината сестра, Росица Кулакова, порача дека ќе бара одговорност и од таткото на Васил и од судијката.

„Оној што не успеал да го воспита сопствениот наследник да ги почитува законите, да разликува добро од зло и да живее чесно, не може да бара доверба да управува со државата. Напротив, ваквите лица не смеат да добијат јавна функција. Тие треба да одговараат за своето делување, но и за криминалните постапки на своите „помлади полнолетници“. Општеството не смее да биде заложник на луѓе без морални темели, а функциите во државата не смеат да бидат засолниште за оние кои не ги почитуваат законите, ниту во својот дом, ниту надвор од него. Ние за Фросина бараме правда, не само од убиецот, бараме да одговара и татко му Зоран Јованов и судијката Даниела Алексовска Стојановска, кои не излегоа јавно да изразат сочувство за семејството, туку кукавички се кријат и бришат профили. Правда за Фросина мора да има!“, порача Росица Кулакова.

Вториот собир ќе се одржи во 17 часот, пред Универзалната сала во Скопје. Од иницијативата „Кој е следен?“ велат „случајот со Фросина Кулакова не е изолиран, се повторуваат истите случаи на неконтролирано возење со години, се повторува неказнувањето и недолжното згаснување на животи. Фрустрирани од состојбите што не се менуваат, повикуваме на изразување на граѓански револт“.

„Протестот има за цел да адресира три главни проблеми:
1. Нефункционалност на системот за заштита на децата и младите кои се во судир со законот
2. Недоволна безбедност во градовите
3. Глорификација на девијантно однесување
Алките во системот за работа со деца и млади во судир со законот не функционираат.

Институциите не настапуваат координирано за идентификување на едата и младите во судир со законите, а тие кои веќе се идентификувани не ја добиваат функционалната грижа за да се изградат во корисни и чесни граѓани на општеството. Дополнително, урбаната инфраструктура не ја осигурува потребната безбедност“, стои меѓу другото во објавата на „Кој е следен?“.

22-годишната Фросина Кулакова пред четири дена беше прегазена од дваесет годишниот Васил Јованов, кој возел пијан, без возачка дозвола и минал на црвено светло, додека таа минувала на пешачки премин на Партизанска.

На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.

Стотици граѓани во петокот на мирен собир запалија свеќи и положија цвеќе пред фотографијата на Фросина, а потоа маршираа до скопскиот кривичен суд каде со извалкани раце од црвена боја извикуваа „Убијци!“.

Mинистерството за внатрешни работи информира дека вчера 64-годишен битолчанец со автомобил удрил пешак, свој сограѓанин, при што тој се здобил со тешки телесни повреди.

„На 01.02.2025 во 09.26 часот во СВР Битола било пријавено дека на ул.„Генерал Васко Карангелевски“ во Битола патничко возило „фолксваген поло“ со битолски регистарски ознаки, управувано од Н.А.(64), удрило во пешакот А.Б.(89), двајцата од Битола. Во несреќата со тешки телесни повреди се здобил пешакот, констатирани во Клиничката болница Битола“, велат од МВР.

Извршен бил увид од увидна екипа од СВР Битола.

Министерот за внатрешни работи, Панче Тошковски, реагираше откако СДСМ го повика на одговорност затоа што притворениот Васил Јованов кој смртно ја прегази Фросина Кулакова, беше фотографиран со мобилен телефон во притворското одделение во затворот „Шутка“.

„Во однос на прашањата на СДСМ упатени до мене за тоа како притвореник во затворот „Шутка“ добил пристап до мобилен телефон, сакам да истакнам дека во секоја правна и демократска држава, најмалку што може да се очекува од политичари кои седум години управувале со институциите е барем основно познавање на нивната поставеност, односно да знаат дека затворите не се во надлежност на Министерството за внатрешни работи, туку на Управата за извршување санкции која е орган во состав на Министерството за правда.

Но, суштината не е во “незнаењето“, туку во нешто многу полошо, а тоа е намерна злоупотреба на една трагедија за собирање на евтини политички поени. Наместо да покажат минимум човечност и емпатија, тие избраа да водат некрофилска кампања, со која на најмизерен начин се обидуваат политички да профитираат од туѓа несреќа.

Јавноста бара правда, а не политички театар и навистина е срамно тоа што СДСМ и во оваа трагедија не успеа да покаже барем малку достоинство“, напиша Тошковски на Фејсбук.

Претходно, директорот на Управата за извршување санкции Александар Пандов извести дека мобилниот телефон веднаш му е одземен, извршен е претрес во сите ќелии и осомничениот Јованов е преместен во самица. Ќе следува и истрага и санкции за корумпираните службеници кои што му го дале мобилниот телефон.

22-годишната девојка пред три дена беше прегазена од дваесет годишниот Васил Јованов од Скопје, кој возел пијан, без возачка дозвола и минал на црвено светло, додека таа минувала на пешачки премин.

На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.

За утре се најавени масовни протести во 12 часот на плоштадот во Кавадарци и во 17 часот пред Универзална сала во Скопје.