Украинскиот претседател Володимир Зеленски изјави дека ќе отпатува во Истанбул на мировни преговори и дека е подготвен да се сретне директно со рускиот претседател Владимир Путин – доколку се појави. Во објава на социјалната мрежа, X му се заблагодари и на американскиот претседател Доналд Трамп за неговата поддршка на иницијативата за прекин на огнот и го покани лично да се придружи на состанокот.

„Тукушто ја слушнав изјавата на претседателот Трамп. Многу важни зборови“, напиша Зеленски, реагирајќи на денешната изјава на Трамп дека постои можност тој лично да отпатува во Истанбул, каде што треба да се одржи состанок меѓу украинската и руската страна.

„Го поддржав предлогот за целосен и безусловен прекин на огнот – доволно долго за да се создаде основа за дипломатија. Ние сме подготвени, од наша страна, да го одржиме прекинот на огнот“, објави Зеленски.

„Исто така, го поддржав претседателот Трамп во идејата за директни преговори со Путин. Отворено реков дека сум подготвен за средба. Ќе бидам во Турција. Се надевам дека Русите нема да се извлечат“, додаде украинскиот претседател.

Зеленски нагласи дека би им значело многу на Украинците доколку Трамп лично се придружи на разговорите: „Тоа е вистинската идеја. Можеме многу да промениме. Претседателот Ердоган навистина може да биде домаќин на состанок на највисоко ниво. Благодарам на сите што помагаат.“

Американскиот претседател Доналд Трамп претходно денес изјави дека тој инсистирал состанокот да се одржи во Турција.

„Мислам дека од таа средба можат да произлезат добри работи“, рече Трамп, додавајќи: „Размислував да одлетам. Не знам каде ќе бидам во четврток, но постои можност ако мислам дека нешто може да се случи“.

Досега само Зеленски официјално го потврди своето учество. Рускиот претседател Владимир Путин сè уште јавно не изјавил дали ќе се појави. Кремљ претходно изјави дека не прифаќа ултиматуми, но не ја исклучи можноста за разговори во Истанбул.

Според неофицијални извори, Москва би можела да го испрати министерот за надворешни работи Сергеј Лавров, со што ќе се создаде впечаток за подготвеност за дијалог без директно присуство на Путин.

Зapaдната стратегија насочена кон уништување на Русија не успеа, санкциите не ја постигнаа својата цел, а Русија ја спречи Украина да се приклучи на НАТО, изјави унгарскиот премиер Виктор Орбан.

„Никој не се осмелува да го признае тоа, но ја загубивме оваа војна“, рече тој, додавајќи дека руската економија не се распадна, пренесува МТИ. На состанокот на претседателите на националните парламенти на земјите-членки на Европската Унија и претседателот на Европскиот парламент, Орбан предупреди дека и покрај ова, Европа сè уште ја продолжува војната и се однесува како да победата е можна.

Орбан верува дека светот е во состојба на трансформација споредлива со раѓањето на националните држави и Вестфалскиот мир. „Менталитетот на западниот свет се менува и Европејците мора да одговорат на овој процес“, нагласи Орбан, оценувајќи дека Европа е неподготвена.

„Како да сакавме да ги решиме проблемите од следната деценија со одговорите од претходната деценија, но старите вистини повеќе не функционираат. Светот се промени, а ние, Европејците, не успеавме да го следиме примерот“, заклучи тој.

Во Будимпешта денес започна Конференцијата на претседатели на парламентите на земјите-членки на Европската Унија насловена како „Европска иднина“. Конференцијата ја отворија унгарскиот премиер Виктор Орбан и претседателот на унгарскиот парламент Ласло Ковер, кои зборуваа за предизвиците со кои се соочува Европа.

Потсетувајќи дека оваа конференција е највисок форум за соработка меѓу националните парламенти и дека нејзина задача е да постави стратешки цели за соработка, Орбан рече дека унгарскиот парламент отсекогаш бил место на соработка и сцена на политички битки, како и на стратешки дискусии.

Тој ги покани учесниците на дијалог за две стратешки прашања кои, како што рече, ќе ја одлучат судбината на Европа и нејзините земји-членки во наредните децении и ќе ја одредат улогата на националните парламенти, наведувајќи дека првото прашање е заштитата на националниот суверенитет, а второто прашање е приемот на Украина во ЕУ.

Според Орбан, денес во светот се случува трансформација. „Нови ветрови дуваат во Соединетите Американски Држави. Програмата на прогресивен либерализам не успеа и беше заменета со патриотска политика. Оваа промена не е само внатрешен американски политички развој, туку има и сериозни меѓународни последици“, истакна Орбан, додавајќи дека ова претставува почеток на нова ера.

Тој истакна дека Кина напредува со брзо темпо и сега се натпреварува не само во индустрискиот капацитет, туку и во нивото на својата технологија.

Партијата Левица оваа недела ќе поднесе предлог-закон за формирање инспекторат за употреба на грбот, знамето и химната на државата, како и знамињата на заедниците во земјата. Бараат да се формира инспекторат оти секојдневно сме сведоци на непочитување на државните симболи, особено за време на јавни прослави, спортски манифестации, па дури и официјални церемонии. Левицата вели дека симболите неправилно и дури и навредливо се употребуваат или, пак, ги нема онаму каде што законот пропишува дека треба да ги има. Решение гледаат во формирање инспекторат, чии инспектори ќе може да влезат и во канцелариите во кои ги има сите други знамиња од светот, освен македонското.

„МВР, генерално, реагира на сквернавење на државните симболи, но дали МВР влегува во канцелариите на градоначалниците во кои нема македонско знаме? Дали МВР влегува во канцеларии во кои имаме американско, француско, германско, сите знамиња на светот, само не македонското. Дали МВР реагира во тој случај? Не. Затоа треба инспекторат што ќе ја следи доследната примена на оваа материја и затоа сметаме дека со ова само ќе се дополни и ќе се пополни правниот вакуум, кој веќе постои“, вели пратеникот Амар Мециновиќ.

Формирањето инспекторат за државните симболи Мециновиќ смета дека е само пополнување на досегашниот правен вакуум.

„Веќе 27 години постои Закон за употреба на државното знаме и државниот грб, но овој Закон нема орган што го спроведува. Исто така, постои Закон за знамињата на заедниците и тој пропишува глоби, но нема институција што ги изрекува тие глоби. Практично, имаме мртво слово на хартија. Овој закон има цел да го исполни овој правен вакуум. Со него се превидува формирање инспекторат во рамките на Министерството за правда, со јасно дефинирани надлежности, процедура за инспекциски надзор и прекршочни мерки. Инспекторатот ќе има капацитет да врши надзор и над институции и над правни и физички лица, а ќе постои и можност граѓаните да поднесуваат инцијативи до него“, рече пратеникот Мециновиќ.

Предлог-законот за формирање инспекторат што ќе поднесат во Собранието од Левицата сметаат дека е суштински бидејќи конечно дава механизам за спроведување на веќе постојните закони и законска материја оти сега имаме законска материја за која нема инспекторат што ќе го следи нејзиното имплементирање и ќе казнува.

Очекуваат широка поддршка од парламентарните групи затоа што не се работи за политики калкулации, туку се работи за пополнување вакуум и враќање на достоинството на државните симболи по долго време нивно непочитување.

„Симболите на една држава не се декоративни елементи, ти се израз на суверенитетот, идентитетот и на колективната меморија на граѓаните кои заедно ја чувствуваат. Овој закон треба да ги зацврсти правната сигурност и еднаквоста на сите граѓани пред правниот поредок“, рече Мециновиќ.

Левицата смета дека сегашното непочитување на државните симболи партијата го нарушува достоинството на државата и на граѓаните.