Американскиот претседател Доналд Трамп го потпиша првиот мировен план за Газа, изјавувајќи при потпишувањето:
„Поминаа 3.000 години за да се стигне до ова, можете ли да поверувате? И овојпат ќе опстане.“

По него, документот го потпишаа египетскиот претседател Абдел Фатах ал-Сиси и турскиот претседател Реџеп Таип Ердоган.

„Ова е неверојатен ден за светот,“ изјави Трамп, додавајќи дека договорот е толку важен што ќе ja спречи Третата светска војна, која, според него, можела да избие на Блискиот Исток.

Претседателката на Европската комисија, Урсула фон дер Лајен, денеска најави дека Европската унија ќе отвори две „ВИ фабрики“ (центри за развој на вештачка интелигенција) на Западен Балкан – една во Србија, а друга во Северна Македонија, во рамки на пошироката иницијатива за вклучување на регионот во технолошкиот развој на Европа, пренесе агенцијата „Анадолија“.

Рече дека дека Западен Балкан има потенцијал да стане центар за стратешки индустрии и иновации и најави дека мрежата на „ВИ фабрики“ на Европската унија ќе се прошири и на регионот, почнувајќи со две „фабрички антени“ во Северна Македонија и Србија, како и дека високобрзинска дигитална инфраструктура ќе ги поврзе сите шест земји од Западен Балкан.

„Тоа значи дека вашите компании ќе имаат пристап до европската инфраструктура за вештачка интелигенција токму тука, во регионот. Со други зборови, компјутерската моќ на Унијата ќе ви биде на располагање. Сакам иднината на вештачката интелигенција да се создава во Европа. И сакам Западен Балкан да биде нејзин составен дел,“ изјави фон дер Лајен.

Истакна и дека Европската унија ќе го засили инвестирањето во земјите од Западен Балкан со цел да го удвои нивниот бруто-домашен производ (БДП) во следните десет години.

Говорејќи на отворањето на Инвестицискиот форум ЕУ–Западен Балкан во Тирана, фон дер Лајен рече дека Планот за раст на Западен Балкан има цел да ја забрза економската интеграција, да ги поддржи реформите и да привлече европски инвестиции.

„ЕУ ги отвора секторите од својата економија за вашите компании. Заедно работиме на реформи за рамноправни услови, а со реформите доаѓаат и инвестиции. Планот за раст на Западен Балкан има за цел двојно зголемување на регионалниот БДП во следната деценија,“ изјави таа.

Фон дер Лајен истакна дека Албанија, Црна Гора и Северна Македонија неодамна се приклучија кон Единствената европска зона за плаќања (SEPA), што ќе ги намали трошоците за трансакции и ќе им заштеди на компаниите од регионот околу 500 милиони евра годишно. „Ова не е само напредок на хартија, туку и во пракса,“ додаде таа.

Во однос на чистата енергија, фон дер Лајен рече дека Западен Балкан може да стане центар за производство, складирање и дистрибуција на обновлива енергија, што ќе придонесе за пониски цени на електричната енергија и за енергетската независност на Европа.

„Инвестирањето во Западен Балкан значи инвестирање во идниот континентален пазар од 500 милиони луѓе,“ истакна таа, нагласувајќи ја стратешката важност на регионот за европската индустрија и енергетика.

Форумот ги обединува претставниците на ЕУ, лидерите од Западен Балкан и инвеститорите со цел да се разгледаат и потпишат проекти кои се очекува да донесат над 4 милијарди евра нови инвестиции, создавајќи нови работни места и економски можности низ целиот регион.

Министерот за здравство Азир Алиу лично смета дека треба да се додаде законска обврска за токсиколошки анализи на сите лекари по скандалозната снимка од директорот на Клиниката за неврологија Игор Кузмановски на која тој меша бела прашката материја и кажува дека зема исклучиво со „чисто бело“. Алиу не е сигурен дали во овој момент ваква законска обврска може да се вметне во некој од 12 здравствени закони кои се менуваат во овој момент.

„Правно не знам дали тоа може да се дефинира. Јас би сакал, како министер за здравство, да има таков член во законот, но да ви кажам во кој закон и дали тоа може да се формулира не би сакал кога не сум сигурен. Јас лично би сакал да имаме уште една институција која што ќе го проверува и тој момент, покрај стручноста“, рече министерот Алиу.

Сега веќе разрешениот директор на Клиниката за неврологија Кузмановски, од март годинава работел со истечена лиценца. Министерот Алиу најави дека неколку комисии, покрај Лекарската комора и Државниот санитарен и здравствен инспекторат работат  на утврдување на тоа дали и какви прегледи правел Кузмановски во периодот додека бил без лиценца.

Иако не е сигурен дали токсиколошките анализи може да станат законска обврска, министерот Алиу најави дека ќе побара во „Мој термин“ да се вметне рокот на лиценцата на лекарите и системот да им забранува логирање во моментот кога ќе им истече важноста на лиценцата.

Алиу извести дека на местото на разрешениот Кузмановски, за вршител на должност го назначил Јован Божиновски, специјалист невролог и асистент на Медицинскиот факултет во Скопје. Тој, пак, рече дека на негова иницијатива на Клиниката ќе се формираат две интерни комисии со кои ќе се иницира внатрешен стручен надзор на работата на разрешениот директор во последните 12 месеци.