На 2.3.2023, полициски службеници од Одделението за внатрешни работи Радовиш, во координација со полициски службеници од Одделот за криминалистичка полиција при МВР, инспектори од Царинската управа, Државниот пазарен инспекторат и Државниот инспекторат за животна средина, со судска наредба извршиле претрес во дом и помошни простории во село Јаргулица, Радовишко, кои се сопственост и ги користат Д. Т. (22), Н. Т. (25) и Б. Т. (44), сите од Радовиш, со престој со No suggestions.

При претресот во дворот биле затекнати 24 патнички возила, 1 товарно возило, 1 шлеп-возило, 3 мотоцикли и 2 каросерии, како и повеќе регистарски таблички. Поради постоење сомнение за сторено кривично дело фалсификување исправа по член 378 од Кривичниот законик, од Д. Т. биле одземени едно патничко возило „фолксваген туарег“, со бугарски национални ознаки, 1.900 евра и 42.000 денари во разни апоени, а од Б. Т. биле одземени 5 словенечки сообраќајни дозволи и 4 договори за купопродажба, кои се однесуваат на возила што во моментот не биле затекнати во дворното место.

Од Царинската управа на Д. Т. му е издадена наредба за непостапување со стоки за 6 патнички возила за кои било утврдено дека ги немаат платено пропишаните давачки во согласност со Законот за царината, а од Државниот инспекторат за животна средина биле констатирани неправилности по Законот за управување со отпадот за што е изречена соодветна санкција. Воедно, од Државниот пазарен инспекторат било констатирано дека Д. Т., Н. Т. и Б. Т. во село Јаргулица вршеле трговија со половни моторни возила без да се регистрирани во соодветниот регистар за што ќе им биде издадено решение за привремена забрана за вршење дејност во траење од 30 дена.

Тројцата биле повикани во Полициската станица Радовиш и со нив биле извршени службени разговори, а за настанот бил запознаен јавен обвинител од Основното јавно обвинителство Радовиш. По целосно расчистување и документирање на случајот, против нив ќе бидат поднесени пријави поради сомнение за сторени кривични дела шверцување по член 278, царинска измама по член 278-а, фалсификување исправа по член 378, како и перење пари и други приноси од казниво дело по член 273 од Кривичниот законик.