Инспекторите од утрово прават анализи во маркетите во однос на тоа како се движеле цените на основните прехранбени производи во изминатите три месеци, односно колку поскапеле производите што не се опфатени со новогодишната кошница.

Министерот за економија и труд Бесар Дурмиши ги повика трговците да ги коригираат цените на оние производи што се најпотребни во овој период на новогодишните празници и да им излезат во пресрет на граѓаните.

„Државниот пазарен инспекторат е на терен на вонредна инспекција и врз основа на податоците што ќе ги добиеме од нив ќе зависи каква одлука ќе биде донесена, дали трговците ќе се коригираат и ќе остане акцијата новогодишна кошница или ќе бидеме принудени да донесеме одлука за замрзнување цени или на маржи“, рече Дуемиши.

Министерот уверува дека Владата нема да ги толерира однесувањето на трговците и покачувањето на цените на одредени производи на сметка на намалување на други производи, кои ги предложија во новогодишната кошница.

„Сакам да апелирам до сите фактори во целиот овој процес, производители, дистрибутери и трговци, да ја покажат општествената одговорност за која зборуваа кога на нивен предлог ја креиравме оваа акција новогодишна кошница. Апелирам да ги коригираат цените на оние производи што се најпотребни во овој период на новогодишните празници и да им излезат во пресрет на граѓаните. Не може тоа што ним им беше дадено како право и можност за едни производи сега да го надоместуваат со драматично зголемување на некои други производи што ги користат граѓаните, како што се маслото, лебот, млекото, млечни производи, шеќерот, солта и така натаму, и така натаму, јајцата и слично“, изјави Дурмиши.

Целта на Владата, како што рече, е преку општествена одговорност кај компаниите за време на новогодишните празници да се намалат трошоците за живот на граѓаните преку самоиницијативно намалување на цените на некои од производите што се најпродавани за време на новогодишните празници.

„Она што на состаноците го договоривме и добивме уверување од производителите и трговците и дистрибутерите е пред почетокот на акцијата да нема драстично зголемување на цените на оние производи што ќе ги понудат и да не се зголемуваат драстично цените на производите што не се на листата на производи во новогодишната кошница“, рече министерот.

Оцени дека акцијата во првите денови почнала успешно, а кај некои производи во кошницата намалувањето на цените било и над 10 проценти. Но, тоа не се случи и кај другите основни прехранбени производи, чии цени се драстично зголемени.

Премиерот Христијан Мицкоски претходно денес рече дека цените кај некои продукти пораснале и до 25 отсто.

На одредени продукти во маркетите цените им се зголемени до 25 проценти, изјави премиерот Христијан Мицкоски, кој најави реакција од институциите.

Според Мицкоски, ваквото однесување н трговците не е етичко, особено пред празниците.

„Тоа што мислеа дека ќе нè надмудрат и си играат со трпението на граѓаните и Владата не е добро. Тоа не е коректно однесување, особено пред празници. На ваков начин не треба да се прават големи профити. Граѓаните очекуваат разбирање, а не наеднаш да се зголмеуваат цените на одредени продукти. Тоа е нечовечно однесување. Реакција од институциите ќе има уште денес, а ако продолжат така, реакцијата ќе биде поголема во периодот што следува“, рече премиерот одговарајќи на новинарско прашање, додавајќи дека трикови од овој тип нема да поминат.

Мицкоски истакна и дека имаат и други мерки на располагање, кои може да ги преземат за производите да не поскапуваат, а за кои јавноста ќе биде информирана.

Премиерот претходно вчера најави дека ќе побара од Пазарниот инспекторат вонредна инспекција со цел да се утврди како цената на одредени основни производи е зголемена во изминатите 30 дена.

Постојат неодговорни градоначалници со неодговорни изјави, но тоа не треба да биде пречка, изјави премиерот Христијан Мицкоски во врска со согласностите за вработувањата и пуштањето во употреба на градинките во Липково и Арачиново.

Мицкоски рече дека разговарал со министерот за социјална политика, Фатмир Лимани, и во текот на денот членови на неговиот кабинет ќе стапат во контакт со администрацијата во Арачиново и Липково и состојбата ќе биде надмината и завршена.

„На жителите на двете општини им се извинувам за непријатностите. Децата се наш приоритет и политиката на оваа Влада е во таа насока. Постојат неодговорни градоначалници со неодговорни изјави, но тоа не треба да биде пречка“, рече Мицкоски одговарајќи на новинарско прашање.

Лимани вчера изјави дека очекува извинување од градоначалниците поради нивните изјави дека е нелигитимен министер.

„Во моментот кога ќе утврди дали сум легитимен или не, тогаш кога ќе се увери дека сум легитимен во исто време и мојот потпис ќе биде легитимен, и двете не одат заедно, мојата нелегитимност и мојот легитимитет како потпис“, рече Лимани.

Од друга страна, градоначалниците на двете општини изјавија дека се соочуваат со бирократски пречки за ставање во функција на објектите.

Градинките во Арачиново и Липково се очекува да сместат по 115 деца.