Судиите упатија остра критика до премиерот, Христијан Мицкоски, во врска со неговите изјави дека моралот не му дозволува да се согласи со зголемување на платите во правосудниот сектор. Тие велат дека неговите коментари ја преминале границата на доброто однесување и преминале во неаргументирани и паушални напади.

„Господине Премиер, веќе подолго време Вашите коментари кои ги давате за судиите и судството ја преминаа границата на доброто однесување и преминаа во неаргументирани и паушални напади. Критиката е добронамерна само кога се даваат конкретни забелешки и конкретни предлози за решавање на проблемите. Неаргументирана критика е покажување на намера ништо да не се преземе за подобрување на состојбите, туку севкупната општествена апатија да се префрли како вина на судиите“, се наведува во јавното писмо упатено до Мицкоски од Судскиот совет, Врховниот суд и Здружението на судии.

Во него се наведува дека судскиот систем никогаш не генерирал долгови, па оттаму, велат судиите, нејасно е каква е поврзаноста на судството со државниот долг од две милијарди евра, кој недвосмислено е последица на постојаното задолжување на извршната власт, во минатото и сега.

„Сосема спротивно, токму судовите, преку наплата на паушали и парични казни, со години наназад ја полнат државната каса, а за возврат не добиваат никаков поврат од Буџетот, во смисла на нови вработувања, дигитализација на услугите, опремување на судниците и слично“, се наведува во соопштението.

Судиите, исто така, наведуваат дека последниот извештај на ЕК, јасно нагласува дека најголемиот проблем во судството е независноста на судиите, која, како што велат, е поткопана од постојано мешање на извршната и законодавната власт.

„Како круцијален проблем е истакната и финансиската зависност на судството од државниот буџет, а во оваа смисла платите на судиите се само еден сегмент од финансиската независност. Ова се проблеми кои државата мора да ги поправи, бидејќи истите се суштински за Европската перспектива на земјата. Со Вашите досегашни коментари го нарушувате демократскиот принцип конципиран на рамноправност на трите власти, судската, законодавната и извршна. Судската власт е уставна категорија, а Уставот и независноста на судската власт треба да се почитуваат“, се наведува во соопштението од Судскиот совет, Врховниот суд и Здружението на судиите.

Мицкоски вчера изјави дека моралот не му дозволува да се согласи со зголемување на платите во правосудниот сектор, коментирајќи ги шесте предложени реформи во законите од областа на судството и обвинителството. Тој порача дека главната реформа во тие закони е токму зголемувањето на платите, што според него е неприфатливо поради состојбата со буџетот.

Мицкоски наведе дека следната година државата треба да врати над 2 милијарди евра долг, поради задолжувањата од минатото, и дека покрај тоа треба да обезбеди пари за плати, пензии и социјални трошоци.

„Ако некои мислат дека треба да им ги дуплираме платите на судиите и обвинителите – нека кажат. Еве, јас ќе ја донирам мојата плата. Ама да обвинуват и да судат според законите“, изјави премиерот, додавајќи дека нема да поддржи реформи чија суштина е само финансиско зголемување и додаде: „Знам дека ќе ме нападнат, но моралот не ми дозволува да се согласам со тоа“.

Непотребно оперирани или неправилно упатени пациенти се пронајдени во десет од анализираните 19 случаи на кои работи домашната Комисија формирана по алармот од кардиологот Сашко Кедев дека во земјава се прават непотребни операции на срце заради заработка. Претседателот на Комисијата д-р Жарко Христовски во оваа фаза вели дека нема да откријат во кои болници се откриени неправилностите и најави конечен, комплетен извештај откога ќе го даде ставот и меѓународната комисија.

„Кога ќе завршиме со комплетниот извештај тогаш ќе можеме да посочиме болници. И досегашните информации се проблематични како можеме да ги издржиме бидејќи не се комплетни извештаите. Кога не се конечни извештаите посочувате со прст кон нешто што не е ниту етички ниту законски “, рече Христвоски.

Досега ги анализирале ангиографските наоди и достапната медицинска документација и Христовски вели дека се на половина од работата, но излегле со првични резултати поради големиот интерес во јавноста. Следува фаза во која ќе влегуваат во здравствените институции, ќе ја проверуваат целосната медицинска документација, а потоа ќе имаат и заеднички средби со меѓународната комисија, за да дојдат до дефинитивна оценка за секој поединечен случај.

„Ова прелиминарен извештај. Втората фаза е заедничка работа, средба со тројца експерти надвор од нашата држава. По завршувањето на анализите од нашата стручна комисија и надворешната стручна комисија ќе имаме прес-конференција со конечен извештај и ќе видиме дали ќе се утврдат истите десет случаи и од страна на таа комисија. На крај тој извештај кај нас ќе биде патоказ за дефинирање на политики во овој дел од здравствениот систем“, рече министерот за здравство Азир Алиу.

До Министерството за здравство и до Фондот стигнеле вкупни 25 пријави за сомнителни операции или упатувања, но комисијата постапувала по 19 од нив оти во шест случи утврдиле дека надлежноста е на Државниот санитарен и здравствен инспекторат каде што ги препратиле случаите.

Меѓународната комисија која ќе има тројца членови се уште не е формирана.

„По плебисцитната победа на локалните избори, каде што граѓаните албанци во секоја општина јасно ја искажаа својата доверба во ВЛЕН, веднаш ја претвораме оваа доверба во конкретна работа и опипливи резултати“, велат од „Влен“.

„Денес, коалицијата ВЛЕН објавува вест што директно влијае на илјадници семејства: Минималната плата ќе се зголеми за околу 2.000 денари во март 2026 година, достигнувајќи 26.400 денари нето. Ова е благодарение на максималната посветеност на министерот за економија, Бесар Дурмиши, и ова е само почеток на реформите што ги носиме во економијата на земјата.

Ова зголемување е најсилниот доказ дека владата на ВЛЕН не познава чекање, одложувања и изговори. Нашите ветувања се претвораат во одлуки, а одлуките се претвораат во опипливи придобивки за граѓаните.

Животниот стандард на работниците е наш приоритет. Достоинството на секое семејство е наша одговорност. Градиме економија каде што трудот е праведно награден, каде што младите луѓе гледаат перспектива и каде што секој се чувствува заштитен.

ВЛЕН ќе продолжи со смели одлуки и јасни политики во служба на граѓаните, бидејќи довербата што ни ја дадовте на 19 октомври се претвора во работа, развој и достоинство. Ова е владењето што се чувствува во животите на граѓаните“, се наведува во соопштението на „Влен“.