Александар Гавриловски, роден на 7 март 1996 година, е 61. жртва на пожарот во кочанската дискотека „Пулс“.

Тој почина денес во 11 часот како еден од покритичните пациенти што се лекувале во Литванија.

Министерот Арбен Таравари изјави дека од 4 април му била влошена состојбата, а од вчера бил ставен на хемодијализа. На телото имал 35 отсто изгореници од трет степен, како и изгореници на дишните патишта.

Во моментот меѓу повредените што се лекувата има уште двајца критични пациенти, а нивната состојба е стабилна.

Александар е вториот пациент што почина во Литванија од 193-те повредени лица во пожарот.

Министерот Таравари изрази сочувство до семејството.

Во петокот минатата недела во Литванија почина и управителот на дискотеката „Пулс“, Александар Карадакоски. Министерот Таравари рече дека неговата состојба цело време била критична, на 1 април му откажале бубрезите, 36 отсто од телото му било со изгореници, а од вдишаниот пламен, дури 90 отсто од дишните патишта му биле изгорени.

Првиот вицепреммиер и министер за животна средина и просторно планирање, Изет Меџити, денеска беше домаќин на советодавната мисија „Рамсар“, предводена од Флоре Лафаје, која престојува во нашата земја за да даде стручни совети и препораки како да се третира и да се стопанисува со Преспанското Езеро.

Езерото од 1996 година е ставено на листата на заштитени подрачја, а намалувањето на водостојот на Преспанското Езеро претставува сериозен проблем.

Министерот Меџити на средбата истакна дека Преспанското Езеро во последните неколку години се соочува со значително намалување на нивото на водата, што претставува сериозна закана за неговиот еколошки систем.

„Климатските промени, користењето на водата за наводнување и подземните истекувања се едни од најголемите закани со кои треба да се соочиме и да се обидеме да ги решиме. Овие проблеми не може да чекаат и затоа се потребни итни и координирани акции“, рече Меџити додавајќи дека државата прави значителни напори да ги исполни барањата на ЕУ и зелениот договор за заштита на природата и климатските промени, како и за заштита на водите.

Меџити се заблагодари за одличната соработка со мисијата, која позитивно одговори на барањето на Министерството за животна средина и просторно планирање, и посака успех во работата. Мисијата ќе посети делови од Преспанското Езеро во Северна Македонија, Албанија и во Грција за да анализира зошто се случува овој феномен.

Претставникот на Рамсарската конвенција, Флоре Лафаје, рече дека е задоволна што има можност да престојува во Северна Македонија и изрази задоволство што Министерството за животна средина покажува зголемената загриженост и што спроведува многубројни активности за заштита на животната средина.

„Сакам да изразам задоволство што владите на Северна Македонија, Албанија и на Грција остваруваат исклучително добра соработка за Преспанското Езеро, кое со својата биолошка разновидност важи за бисер на природата, и би сакала да продолжи овој тренд, и со зголемен придонес на ЕУ, УНДП и ГЕФ, во соработка со трите влади, да го решиме овој проблем“, изјави Лафаје.

Министерството за животна средина на Северна Македонија од Секретаријатот на Рамсарската конвенција побара посета на Советодавната мисија, а кон ова барање подоцна се приклучија и Албанија и Грција, претставени на средбата од претставничката од Албанија, Јула Селмани, раководител на секторот за испорака на проекти од Националната агенција на заштитени подрачја, и од Грција – Лито Падопуло и Виви Румелиту.

Рамсарската конвенција е меѓународен договор воспоставен во 1971 година, прва заштитена област во Северна Македонија беше Преспанското Езеро со природниот парк „Езерани“ во 1996 година, потоа Дојранското Езеро во 2008 година, а во 2021 година на листата беа додадени Охридското Езеро и Студенчишкото Блато.

Премиерот Христијан Мицкоски очекува бргу да се коригира одлуката на САД за зголемувањето на царините кон Македонија од 33 отсто. Тој вчера најави добри вести од САД за македонските граѓани, но вестите, како што кажа и самиот, сѐ уште не стигнале, а процесот е сензитивен. Кога сѐ ќе се заврши, рече премиерот, тогаш ќе излезат во јавноста со детаљни информации.

Според него, во пресметката за царините кон нашата земја очигледно направена е некаква грешка или се работи за погрешна информација.

„Ние работиме со нашите партнери САД и очекувам многу бргу да се коригира ова што очигледно е резултат на некаква грешка или погрешни информации имајќи предвид дека лани нашата трговската размена со САД беше во негатива, односно сме во дефицит, а тие држави што се во дефицит немаат ваков тип зголемување на давачките“, изјави Мицкоски одговарајќи на новинарско прашање по прес-конференцијата за зголемувањето на капитацискиот бод на матичните лекари.

Во однос на тоа како царините ќе се одразат врз македонската економија, премиерот рече дека секундарните ефекти би можеле да бидат значително поголеми од директните доколку земјите од ЕУ не успеат да го надминат спорот со САД.

Премиерот вчера изјави дека Владата и институциите на САД се во постојана комуникација, со тамошните министерства за економија и за финансии, со Стејт департментот, со кабинетот на претседателот Доналд Трамп.

Минатата недела американскиот претседател Доналд Трамп воведе нови царини за увозот од 180 земји, вклучувајќи ја и Македонија. За увозот од Македонија, Трамп одреди царина од 33 отсто.

Владата потоа уверуваше дека одлуката на САД за царинските трошоци нема да има големо влијание врз нашата економија, а тие имаат план за надминување на ситуацијата. Македонската Влада тогаш истакна дека нема потреба од паника и избрзани реакции и заклучоци.

Трговската размена меѓу Македонија и САД минатата година изнесувала 314 милиони долари, од кои 118 милиони долари е извоз на Македонија.