Нерасчистени должничко-доверителни односи била причината за синоќешниот оружен инцидент во скопската населба Аеродром, кога загинаа три лица

Ова денеска го соопшти Министерството за внатрешни работи, повикувајќи се на изјавата на лицето што го извршило убиството, а кое утрово самото се предало во полиција.Официјално, синоќа биле убиени 36 годишниот Владо Милошев, кој бил припадник на МВР, 37. годишниот Јордан Јорданов и 26. годишен Влатко Андреевски. Првичните неофицијални информации се дека убиството го извршил 47 годишниот Тони Денковски од Скопје.Од изјавата на приведениот кривичното дело го извршил поради нерасчистени должничко-доверителни односи со Јордан Јорданов, кој бил вмешан во франкфуртската мафија.МВР не располага со информации како припадникот на полицијата се нашол на иста маса со другите двајца убиени. Дали тоа било случајна средба или се работело за претходно познатство, не е познато, иако од МВР тврдат дека полицаецот немал никакво криминално досие.Според министерката Гордана Јанкулоска, безбедносната ситуација во земјата не е загрозена и МВР навремено ги расчистува ваквите инциденти.Министерството за внатрешни работи денeска излезе со официјални информации за мотивите на синоќешното убиство и имињата на загинатите.„Од првичната изјава која осомничениот за убиството ја даде, се работи за должничко доверителски односи помеѓу него и еден од убиените. Нивното познанство датирало од порано и тие во повеќе наврати влегувале во должничко доверителски односи кои не биле расчистени. Како револт, според негово кажување, притисоците кои биле вршени врз него во континуитет во подолг период, се одлучил за ваков чин“ изјави министерката за внатрешни работи Гордана Јанкулоска.МВР не располага со информации за тоа дали се работи за тоа како се нашол полицискиот службеник, кој работел во одделот за обезбедување на работно место, главен оперативен работник за обезбедување на странски делегации, заедно со останатите двајца убиени. Според МВР, цел на убиецот бил Јордан Јорданов.„МВР не располага со информации дали се работи за случајна средба или за претходно познанство од било каков тип, Понатаму во истрагата ако дојдеме до нови моменти ќе бидете благовремено информирани. Се чини, според првичните информации дека целта на убиецот бил еден од жртвите кои, како што претходно реков и претходно минувал во казнена евиденција “ изјави Јанкулоска.МВР ги истражува сите шпекулации во јавноста дека полицискиот службеник бил линк меѓу нарко подземјето и полицијата. Министерката денеска не сакаше да коментира ниту за семејните врски на убиените, односно за шпекулациите дека еден од убиените бил во блиска роднинска врска со шефот на обезбедувањето на премиерот.„МВР во континуитет ги истражува сите шпекулации кои се појавуваат во јавноста. Од проверките кои досега ги извршивме, полицискиот службеник кој почина во вчерашната престрелка нема криминално досие и претходно не е осудуван, се разбира дека наш интерес е целосно расчистување на сите настани“ изјави Јанкулоска.Осомничениот за убиството бил пријавуван само за ситни деликти. МВР не ги открива активностите што сега моментално се преземаат, ниту пак ги потврдува шпекулациите дека во моментот во Велес се вршат рации.„По однос на активностите што МВР во моментов ги презема на терен заради осетливоста на целата проблематика, во овој момент нема да ви дадеме информации но секако дека благовремено ќе ве информираме. Јордан Јорданов е лице кое и претходно е пријавувано за кривични дела поврзани со недозволена трговија со оружје и осудувано со разни казни, всушност и случајот наречен „Франкфурт мафија“ беше случај во којшто токму ова лице беше опфатено“ вели Јанкулоска.Истекот на рокот за притвор, според МВР, е причината поради која лицата кои беа вклучени во случајот „Франкфурт мафија“ се на слобода.„Токму по однос на овој случај во соработка со австриското министерство за внатрешни работи, МВР со оглед на тоа што се работи за лица кои се наши државјани, поднесе кривична пријава и на дел од лицата опфатени со таа кривична пријава им беше определена мерка притвор. Меѓутоа рокот за кој таа мерка притвор беше определена е истечен и тоа е причината поради која тие во овој момент се на слобода, односно дел од нив во други кривични дела и инциденти веќе го загубија животот“ изјави Јанкулоска.Синоќа околу 19:40 часот,  убиецот со калашников кој го носел во вреќа пукаше кон три лица кои седеле на заедничка маса со девојка во рибниот ресторан.Откако го извршил убиството, непознатиот сторител, кој спред очевидците бил средовечен маж, ја фрлил автоматската пушка, влегол во автомобил марка „Опел корса“и заминал во непознат правец. Јорданов почина на лице место, а останатите двајца, живото го загубија во ургентниот центар.