Триесет и петгодишна жена од Тетово пријавила во полиција дека нејзиниот сопруг вчера физички ја нападнал неа и нивната ќерка и оштетил дел од покуќнината.

Тој бил приведен во полициски станица, а по целосно документирање на случајот против него ќе биде поднесена соодветна пријава.

Во близина на мостот на автопатот Велес-Катланово, во водите на реката Пчиња, вчера бил пронајден починат 73-годишен маж.

Според информациите од МВР, се работи за жител на Катланово, со иницијали С.П. кој на 20 јануари бил пријавен за исчезнат.

Смрт констатирал лекар од Итна медицинска помош, а по наредба на Јавен обвинител телото било предадено за обдукција.

Цело семејство од Охрид е пренесено во болница поради вдишување чад откако избувнал пожар во нивниот стан.

Според информациите на полицијата, вчера околу 07 часот бил пријавен пожар во стан на улицата „Карпош Војвода“, сопственост на К.Џ.(70) од Охрид.

Пожарот бил изгаснат од екипа на Територијалната противпожарна единица Охрид, а К.Џ. и неговото семејство поради вдишен чад биле пренесени во Медицински центар Охрид.

Увид на местото извршила екипа на СВР Охрид. Се утврдуваат причините за пожарот.