Од истражниот затвор Скопје, вчера е пуштен охриѓанецот Ѓоко Наумоски, обвинет за помагање по извршено кривично дело во случајот со убиството на српскиот турист Дејан Новаковиќ, што ова лето се случи во Охрид, јавува Охридњус.

Ѓоко Наумоски, кој инаку е вработен во кабарето „Куба либре – Хавана“, од синоќа се наоѓа во домашен притвор, каде веројатно ќе остане до почетокот на судскиот процес, дознава Охридњус од извори на одбраната.Неговата одбрана верува дека во текот на постапката ќе се докаже невиноста на Наумоски, кој во притвор мина точно три месеци.Претходно Обвинителството се откажа од понатамошно кривично гонење на Јане Шокароски, Петар Шенгулоски, Борче Чулукоски и Јован Ѓорески, сите од охридско, за кои немало докази дека биле инволвирани во убиството на Дејан Новаковиќ. Тие на 12-ти ноември беа пуштени од притвор, каде до судењето остануваат Митре Костоски и Илче Јоноски, двајцата од Охрид, кои заедно со Драган Ѓорѓевиќ, српски државјанин, кој е во бегство, се товарат за убиство на свиреп начин за што Законот предвидува казна затвор од десет години до доживотен затвор. На 27 август српскиот државјанин 34-годишниот Дејан Новаковиќ беше претепан до смрт во тепачка во центарот на Охрид. Веднаш по инцидентот беа притворени седум лица од Охрид, за подоцна четворица од нив да бидат ослободени од понатамошно кривично гонење, едно ќе одговара за прикривање докази, додека за убиството се обвинети три лица, од кои едно се уште не е достапно за органите на прогонот.Судскиот процес за убиството на српскиот турист се очекува да биде закажан наскоро.