Новата истрага која што босанските власти најавија дека ќе ја отворат за загинувањето на претседателот Борис Трајковски, нема да ги опфати доказите за кои зборуваше адвокатот Игнат Панчевски.

Одговарајќи на прашање на босанското дописништво на турската агенција „Анадолија“, дали новата истрага ќе ги опфати и новите докази за кои во јавноста говореше адвокатот Игнат Панчевски, претседателот на Комисијата за воздухопловство при Министерството за транспорт и комуникации на БиХ, Омер Кулиќ рекол дека „новата истрага нема врска со адвокати“.

Панчевски последно тврдеше дека има сателитски снимки кои покажуваат како Кингерот со ракета го погодил друг авион.

Како што најави Кулиќ, во наредните два до три дена ќе биде соопштена одлуката во врска со можноста за отворање на нова истрага, односно обновување на истрагата.

„Владата на Македонија формирала Комисија која шест години работела на овој проблем. Направиле многу и ние со нив сме во постојана врска. Многу брзо се ќе биде готово. Најверојатно ќе се оди кон отворање на нова истрага“ вели Кулиќ.

Запрашам што подразбира под нова истрага и дали тоа би значело дека истражните органи повторно ќе излезат на терен и ќе сослушуваат сведоци, Кулиќ појасни дека ќе биде спроведена комплетна истрага и дека ќе биде направено се што е потребно.

Во јули  македонскиот министер министерот за транспорт и врски Миле Јанакиески на својот босански колега Дамир Хаџиќ му достави документ со нови сознанија за падот на авионот во близина на Мостар, во кој загинаа тогашниот македонски претседател Борис Трајковски и неговите соработници.

Новиот извештај на кој работеа десетици македонски експерти, пилоти и правници лоцирал многу пропусти на првичната истрага од страна на босанските воздухопловни власти кои не биле истражени.

Министерот Јанакиески му упати на Министерот Хаџиќ официјален предлог за повторно отворање на истрагата и му предложи формирање на мешовита работа група за таа цел.

Владиниот „кингер“ со кој патуваше претседателот Трајковски на Меѓународна конференција за инвестирање во Босна и Херцеговина на 26-ти февруари 2004 година се урна во атарот на Матиќ Брдо кај селото Хусковиќи во близина на Мостар.

Беше предвидено авионот да слета на мостарскиот аеродром во осум часот по локално време. Остатоците беа пронајдени 24 часа по паѓањето на авионот. И македонското и босанското обвинителство случајот го затворија како несреќа. Официјално несреќата се случила поради грешка на пилотите.

Сомнежите дека загинувањето на Трајковски не е несреќен случај, туку убиство ги поттикна швајцарскиот пратеник во европскиот парламент Андреас Грос. Тој беше и иницијаторот за формирање на анкетната комисија која ги истражува околностите под кои загина претседателот Трајковски.

Во несреќата покрај Трајковски животот го загубија Димка Илкова – Бошковиќ, Ристо Блажевски и Анита Кришан – Лозановска од Кабинетот на претседателот, Миле Крстевски од Министерство за надворешни работи, Борис Велинов и Аце Божиновски, членови на обезбедувањето, и пилотите Марко Марковски и Бранко Ивановски./крај/мф/фф