На денешниот настан, Саем-Отчет под мотото „4 години работа за тебе” свое обраќање на панел дискусијата имаа скопските градоначалници.

Градоначалникот на Кисела Вода и кандидатот за градоначалник на Град Скопје, Орце Ѓорѓиевски, образложи што е направено изминатите 4 години за општината односно ги истакна клучните проекти кои се направени изминатиот период како вложувањето во патната инфраструктура, изградба на градинки, инвестирање во образованието со изградба на основни училишта и спортски терени, притоа истакнувајќи дека сето тоа искуство ќе го пренесе и за градот Скопје.

„Во минатото имавме еден затворен однос од институциите, ниту пак некој ни подаде рака различна е состојбата од кога се направија промени на централно ниво, откако претседателот Христијан Мицкоски е на чело на Владата на Република Македонија. Еден од најгорливите проблеми за нашето население во Кисела Вода, особено за младите брачни парови, беше недостатокот на места во градинките, ние ја наследивме општината со над 450 дечиња на листите на чекање. Во финална фаза ни е градинката во Потстаница, се потрудивме во изминатиот период да во секое населено место да обезбедиме објект во којшто ќе бидат згрижувани дечињата и практично листите од 450 ги сведовме на нула, што е сериозен прогрес. Што се однесува до основното образовани и инвестициите таму, во моментот сме во фаза на доградба на две основни училишта, каде што нашата интенција води кон тоа и од аспект по практично да биде за родителите но и од аспект на заштеди на институциите, особено за општината и основните училишта , да воведеме едносменско работење на сите основни училишта“, рече Ѓорѓиевскки.

Ѓорѓиевски истакна дека се изградени многу спортски терени и дека е направена модерна, современа патна инфраструктура како и дека е решен проблемот со дивеењето урбаната мафија во Расадник, со тоа што се поништени 99 маркици за градба.

„Повеќе од 20 спортски терени се изградени изминативе 4 години во општина Кисела Вода, во моментов се градат три нови спортски сали и четири се целосно реконструирани. 70 километри патна инфраструктура имаме за четири години во Кисела Вода, создадовме модерна современа патна инфраструктура и сите населени места бидат обезбедени со подземна инфраструктура, тоа подразбира водоводна и одводна мрежа. Она што претставуваше горлив проблем во минатото беше и дивеењето на урбаната мафија, јас бев еден од ретките кој што спроведе Меѓународен конкурс за идејно решение за деталниот урбанистички план во Расадник и поништивме 99 маркици за градба таму“, истакна Ѓорѓиевски.

„Наследивме општина која беше финансиски, исклучително, девастирана без можност за раст и развој. А, во сиот овој период, успеавме да ги сервисираме сите стари долгови кои што беа повеќе од 4 милиони евра, вклучувајќи ги кредитите, да ги вратиме сите тие средства и да бидеме во функција сами да градиме иднина за Ѓорче Петров“, вели Александар Стојкоски, градоначалникот на општина Ѓорче Петров на денешниот настан, Саем-Отчет под мотото „4 години работа за тебе“.

Стојкоски посочи дека во изминатите четири години, најмногу се задржале во изградбата на инфраструктурата, но сепак се градеше и инвестираше во сите области.

„Успеавме да ја реконструираме и да изградиме од ново над 150 улици, а во моментов сме во постапка за изградба на уште околу 90-тина улици или приближно, 20 километри нова патна инфраструктура, надодадена на оние 40 километри кои што ги изградивме за време на мандатот, вклучувајќи ги тука и деловите во урбаниот и руралниот дел на општината“, истакна Стојкоски.

Покрај изградбата на улици, посочи дека се работеше и на изградба на нови линии за атмосферска и фекална канализација во деловите каде што имаше потреба.

„Но, она што најмногу радува е тоа што успеавме да ги зголемиме капацитетите за сместување во детските градинки. Градиме нова градинка за прв пат во Стопански Двор, во постапка сме за уште една нова детска градинка во населбата Дексион. Го отворивме првиот сензорен центар кој е прв од таков тип во Република Македонија во градинката Пампучево во Ѓорче, го реконструиравме 100 години стариот објект на кој му дадовме живот на објектот на основното училиште во Кучково, кој што ќе служи за првиот регионален центар за децата кои што се излекувале од карцином“, рече, меѓу другото, Стојкоски.

Градоначалникот на Општина Гази Баба, Бобан Стефковски истакна дека општина Гази Баба била затворена општина каде што наместо граѓаните да одлучуваат одлучувале поединци, како и дека општината имала голем број нерешени предмети и бесправно изградени објекти и дека истите тие се веќе решени.

„Навистина јас начекав една затворена општина во којашто наместо граѓаните да одлучуваат три, четири луѓе од локалната самоуправа, голем број на нерешени предмети на граѓаните, предметите за легализација на бесправно изградени објекти, сите предмети коишто ја имаа комплетирано уредно својата документација се решени веќе во општина Гази Баба. Навистина покажавме дека како тим можеме да работиме поинаку, дека може да се работи чесно, транспарентно и посветено за доброто на секој еден граѓанин“, рече Стефковски.

Стефковски истакна дека општината се посветила на комуналната и патна инфраструктура, дека се реализирани 670 проекти, подобрување во водоснабдувањето во руралните населени места, како и фокус на образованието.

„Особен фокус ставивме на комуналната инфраструктура и подобрување на патната инфраструктура , во изминатите четири години во општина Гази Баба се реализираа вкупно 670 проекти што е навистина за поздрав, од аспект на изградба на фекална инфраструктура изградивме вкупно 32 км фекална канализациона мрежа во неколку населени места, го подобривме водоснабдувањето во руралните населени места, асвалтиравме и поплочивме вкупно 170 улици, една импозантна бројка, со макотрпна работа промените се веќе видливи, особено фокус во нашето инвестирање беше образованието, обезбедивме бесплатни униформи за сите 6800 ученици во основните училишта, доделуваме 5000 денари за секое новороденче, и 3000 денари за секое семејство коешто ќе има прваче на почетокот на учебната година“, дециден е Стефковски.

Градоначалникот на Општина Аеродром, Дејан Митески рече дека пред четири години општина Аеродром била општина со 0 транспарентност, максимална затвореност, тешка пристапност од страна на граѓаните и општина која не работела во интерес на граѓаните.

„Ние пред 4 години наследивме една општина којашто имаше 0 транспарентност, општина којашто не работеше во интерес на граѓаните, беше максимално затворена и граѓаните имаа тешка пристапност. После само четири години, последниот извештај на ЦЕА во однос на транспарентноста не рангира на второ место во Македонија, со максимален број на поени, што покажува дека многу сме работеле во таа насока на транспарентност и отвореност кон граѓаните“, рече Митески.

Митески објасни дека општината била предмет на урбан хаос, но сега статистичките податоци покажуваат дека одобренијата за градење се значително намалени.

„Пред четири години наследивме една општина којашто беше предмет на урбан хаос, во општина во којашто имавме повеќе кранови за згради отколку насадени дрвја, и тоа е нешто на коешто посветивме максимално внимание како општина како институција да воведеме ред во тој урбан хаос. Статистичките податоци покажуваат дека во овој мандат споредбено со претходниот мандат бројот на издадени одобренија за градење, за нови станови за 86% намален, тоа значи многу помалку станови и многу повеќе вложување во инфраструктурата“, објасни Митески.

Градоначалникот истакна дека во Аеродром во исто време се градат основни училишта, детска градинка како и спортски сали.

„Во изминатава година во Аеродром за прв пат во исто време се градат и основни училишта и детска градинка и спортска сала, нешто што досега не се случило 20 години откако постои општината, заедно со мојот тим градиме проекти коишто не се само железо и бетон проекти коишто не се само хартија, туку проекти коишто ќе значат насмевки, коишто ќе значат радост, проекти од коишто ќе извадиме утре идни спортисти, вложуваме во спортска инфраструктура, во изминативе четири години работевме апсолутно во интерес на граѓаните во решавање на проблемите“, дециден е Митески.

Градоначалникот на општина Сопиште, Стефче Трпковски ги наведе клучните проекти за својата општина.

„Со јасна визија, чесен и транспарентен пристап стигнавме до конкретни резултати покажавме што значи одговорна локална власт. Мојот трет мандат го започнав со изградба на прочистителна станица за населено место Ракотинци, потоа продолживме со промена на јавното осветлување, со овој проект освен што заштедивме средства во буџетот, го подобривме и осветлувањето. Изградивме нова детска градинка со капацитет од 84 дечиња, го доизградивме културниот дом и го опремивме овој е центар на многу културни настани, проектите се бројни, реализиравме проекти кои беа по барање на жителите. Асфалтиравме повеќе од 20 улици, потпишавме меморандум со Стоматолошкиот факултет во Скопје за жителите на општина Сопиште бесплатно да имаат стоматолошки услуги и прегледи“, вели Трпковски.

Градоначалникот на општина Зелениково, Коста Маневски ги наведе клучните проекти за својата општина, истакнувајќи дека со транспарентно работење и јасна визија се доаѓа до резултати кои се од големо значење за граѓаните на општиниа Зелениково.

Градоначалникот Маневски истакна дека за прв пат во Зелениково ќе се изгради градинка со капацитет за 86 деца, кој како проект ќе обезбеди над 20 нови вработувања, исто така потенцираше дека општината обезбедува еднократна помош од 5.000 денари за секое новороденче.

„Во една мала општина како што е Зелениково, е многу тешко да се работи од причина што таа има многу мал буџет, од самиот почеток на мојот мандат наследивме многу лоша финансиска состојба, заедно со општинската администрација, со советот со граѓаните на општина Зелениково, ги детектиравме реалните потреби и започнавме веднаш со работа, со припрема на урбанистичка, планска документација. Благодарение на Владата на Република Македонија за прв пат во општина Зелениково ќе се изгради градинка со капацитет за 86 деца, тоа е проект и кој ќе обезбеди повеќе од нови 20 вработувања, отворен е целодневен престој за учениците од прво до трето одделение, за прв пат нашата општина, обезбедува еднократна парична помош за секое новородено дете во висина од 5.000 денари, се обезбедува еднократна финансиска помош 3.000 денари за секое запишано дете во прво одделение, обезбедени се училишни униформи“, рече Маневски.

Градоначалникот на општина Илинден, Александар Георгиевски на денешниот настан саем-Отчет под мотото 4 години работиме за тебе се осврна на состојбата во општината или што се се правело во изминатите четири години.

Георгиевски укажа дека Илинден е општина препознатлива по економските зони, а според едно истражување од неодамна по глава на жител најбогата или како што рече Илинден е центарот на индустријата.

Георгиевски укажа дека многу инвестираме и во подобар живот на граѓаните.

„Ќе ја потенцирам комуналната инфраструктура која е многу важна. Само во делот на улици и патишта се изградени и реконструирани над 230 патишта. Во делот на фекалната канализација и управување со животна средина направивме над 23 километри фекална канализација, над 8 километри водоводни линии. Во делот на улично осветување направивме 18 километри нови линии на улично осветлување“, информираше Георгиевски.

Георгиевски се осврна и на инвестициите или вложувањето за најмладите жители на општина Илинден.

„Во делот на образованието и детската заштита изградивме ново училиште со капацитет над 450 ученици, а кога станува збор за детските градинки го зголемивме опфатот за уписи на над 150 нови места“, кажа Георгиевски.

Градоначалникот на општина Петровец, Борче Митевски наведе што е реализирано изминатите години, кои се инвестициите кои се направени за општината, истакнувајќи ги трите индустриски зони, изградбата на нови училишта, детски градинки, фудбалски стадиони, забавни паркови како и велосипедска патека.

„За да бидеш успешен градоначалник треба да имаш визија за својата општина, таква приказна имав јас за општина Петровец. Направивме три индустриски зони од кои најголемата зона Чојлија со 230 хектари, тука имаме некаде околу 170 инвеститори како странски така и домашни и заедно со Илинден сме водечки општини по влезот на странски и домашни инвеститори. Со отворањето на зоните го решивме проблемот со вработувањето во нашата општина го решивме финансискиот проблем со општина Петровец, продолжуваме да инвестираме во сите населени места имаме 17 населени места немаме населено место каде што немаме водоводна мрежа или канализациона мрежа, изградивме локални улици со бекатон и со асфалт , изградивме нови училишта, детски градинки во тек е изградба и на трета детска градинка, со што трајно го решаваме проблемот со упис на деца, изградивме нова општинска зграда ги подобривме услугите, изградивме четири фудбалски стадиони за натпревари во втора лига, детски забавни паркови и велосипедска патека“, рече Митевски.

Градоначалникот истакна дека граѓаните можат да очекуваат во иднина реализација на многу проекти, меѓу кои и нов Културен дом како и проширување на урбанистичките планови.

„Жителите на општина Петровец што можат да очекуваат во иднина, за само 10 дена ќе бидеме сведоци на нов Културен дом во Петровец, ќе финансираме во сферата на младите, она што ветувам и реализирам. Ќе продолжиме со проширување на урбанистичките планови, имаме голем број на млади брачни парови тоа е иднината на општина Петровец, тоа го заслужуваат жителите“, вели Митевски.

Претседателот на ВМРО-ДПМНЕ, Христијан Мицкоски, на денешниот отчет по повод четиригодишната работа на градоначалниците, порача дека веднаш по локалните избори ќе има промени во партијата, како и реконструкција и подобрување на капацитетите на Владата.

„Ние ќе се менуваме и надоградуваме врз основа на потребите на граѓаните. Ниту една функција не е загарантирана ниту вечна. Затоа веднаш после изборите ќе ги отвориме вратите на партијата за нови луѓе, а во Владата ќе има реконструкција. Тоа не значи дека луѓето кои ќе се заменат биле лоши, туку дека секогаш е потребен зголемен капацитет и посилно темпо за промените кои ги правиме“, изјави Мицкоски.

Тој нагласи дека Македонија нема да се врати во минатото и дека граѓаните ќе им кажат „не“ на СДСМ и ДУИ.

„ДУИ уште долго ќе биде во опозиција. Таму припаѓаат заедно со нивниот коалициски партнер во криминалот, СДСМ. Овие избори нема да бидат нивната врата кон Владата, а интригите и игрите од Зајас и Мала Речица нема да поминат“, порача лидерот на ВМРО-ДПМНЕ.

Мицкоски остро ги обвини СДСМ и ДУИ за тајни договори на штета на народот.

„Повеќе од јасно е дека овие две партии имаат сценарио – не за народот, туку против народот. Со фантомски листи и независни кандидатури сакаат да го урнат изборниот процес, да го збунат гласачот и да ја заматат сликата за нивниот историски пораз кој доаѓа“, истакна тој.

Почетокот на четиригодишниот мандат на ВМРО-ДПМНЕ на локално ниво се оцени како период на разочарувања, нечисти општини, урбанистички хаос и раст на трошоците за граѓаните, велат од СДСМ.

„Четири години локална власт на ВМРО-ДПМНЕ се четири години разочарувања за граѓаните. Наместо развој и проекти, донесоа само тендерски скандали и партиски злоупотреби на народните пари“, истакнаа од СДСМ.

Според партијата, низ општините предводени од ВМРО-ДПМНЕ се испумпувале пари преку фирми блиски до власта, додека јавноста добила сведоштва за неприродни тендерски процедури каде што едни исти компании редовно се јавуваат како единствени понудувачи.

„Наместо да се подобри животот на граѓаните, тие воведоа поскапи сметки за вода, канализација и смет, како и повисок данок на промет. Општините Прилеп, Штип, Охрид, Битола, Гевгелија, Велес и други бележат значително поскапување на трошоците за граѓаните“, посочуваат од СДСМ.

Главниот град Скопје, според СДСМ, е симбол на урбана деградација: нечисти улици, хаос во јавниот превоз, нефункционални јавни претпријатија, над 150 незаконски дивоградби и узурпиран јавен простор.

„Клучното ветување за бесплатен градски превоз никогаш не се реализираше. Нема ниту 250 еколошки автобуси, ниту модерен транспорт“, велат од партијата.

СДСМ ја оцени локалната власт на ВМРО-ДПМНЕ како неспособна, корумпирана и целосно оддалечена од потребите на граѓаните, додека локалните избори ги сметаат за шанса за „враќање на општините во служба на народот“.

„Локалните избори се шанса да се стави крај на четиригодишното разочарување, хаосот, нереализираните ветувања и криминалот“, велат од партијата.