Седумнаесет лица се уапсени и во вторник се изведени пред истражен судија, меѓу кои и еден бугарски државјанин, а против нив е поднесена кривична пријава за криумчарење цигари од Македонија во Бугарија.

Меѓу пријавените е и еден полициски службеник кој е вработен во граничната полиција

„Утрово заедно со кривичната пријава и обезбедениот доказен материјал, 17 лица кои се дел од дваесетчлената организирана криминална група инволвирана во криумчарење на цигари беа изведени пред истражен судија“, изјави министерката за внатрешни работи Гордана Јанкуловска.

Криминалната група, според Јанкулоска, е составена од 19 македонски државјани и еден бугарски државјанин, и се товари дека во периодот од септември 2010 до септември 2011 организирала вкупно 12 нелегални транспорти на цигари од Република Македонија кон Република Бугарија.

Последната акција за сузбивање на тутунската мафија која се водеше по Оперативно име „Филтер“, беше реализирана во текот на вчерашниот ден во Скопје, Тетово и повеќе градови низ источна Македонија при што биле приведени и организаторите и членовите на добро структурираната криминална група.

Групата во септември 2010 година ја создал 47-годишен жител на Скопје, потпомогнат од 41 годишно лице од Тетово и други пет лица од Скопје, заради вршење на кривични дела криумчарење цигари. Останатите членови од Струмица, Делчево, Кочани и Берово, кои се на возраст од 25 до 60 години, имале задача илегално да ги пренесуваат цигарите во соседна Бугарија. Како логистика од другата страна на границата им бил 34-годишен бугарски државјанин, кој исто така е опфатен со пријавата. Меѓу пријавените фигурира и еден полициски службеник, вработен во граничната полиција, кој имал задача членовите на групата да ги информира за движењето на полициските патроли по граничната линија.

Инаку, криминалната група се занимавала со организирање на криумчарење и транспорт на акцизна стока – цигари со и без акцизни маркички од Албанија и Косово во Македонија, а потоа од кон Бугарија. Членовите на групата цигарите ги складирале во магацински простории на територијата на Скопје и околината или во помошни магацински простории лоцирани во близина на македонско- бугарската граница во нивна сопственост.

Мал дел од криумчарените цигари членовите на криминалната група ги пуштале во промет и на територијата на Македонија, додека поголемиот дел по нелегалното внесување, повторно ги транспортирале и ги криумчареле во Бугарија, поради тоа што цигарите како акцизна стока, во Бугарија имаат значително поголема вредност (споредено со малопродажните цени во РМ), што на организираната група и носела значително поголем нелегален профит.

Имале организирана мрежа на транспортери кои ги транспортирале цигарите до источниот дел на Македонија на подрачјата на Крива Паланка, Делчево, Кочани, Берово, Струмица каде што ги предавале цигарите на останатите членови на групата.

Целата операција на МВР за сузбивање на оваа група се работело подолго време така што покрај овие 20 лица, претходно се кривично пријавени, дополнителни шеснаесет члена на оваа криминална група (12 македонски и 4 бугарски државјани) – транспортери на цигари кои во временскиот период од септември 2010 година до септември 2011 година се обиделе да извршат 12 транспорти на вкупно 2.976.220 парчиња на цигари од Р.Македонија во Р.Бугарија. Овие транспорти на цигари од страна на МВР на РМ се спречени, при што вкупната вредност на запленетите цигари изнесува околу 8.000.000,00 денари.

Во понеделникот, со судска наредба, биле извршени и 17 претреси во домовите на членовите на криминалната група при што се пронајдени поголема количина рефус цигари (три пакети), неколку килограми марихуана, 100 пакети енергетски пијалак РЕД БУЛ (нелегално внесен од Косово), над 15.000 евра, 341 штеки цигари без акцизни маркички, 3.983 македонски акцизни маркички за кои се претпоставува дека се фалсификувани и едно патничко моторно возило користено за вршење на кривичните дела.

Тројца од осомничените вчера не и биле достапни на полицијата и против истите ќе се преземат дополнителни мерки за нивно пронаоѓање.

Против сите 20-мина членови на криминалната група до Основно Јавно Обвинителство за гонење на организиран криминал поднесена е кривична пријава за сторени кривични дела „Криумчарење“.

Паралелно со реализирањето на оваа акција, МВР по претходни добиени оперативни сознанија пресече уште еден меѓународен канал за криумчарење на цигари. Откриени се повеќе лица од Делчево кои подолг временски период се занимавале со криумчарење на акцизна стока – цигари на подрачјето на Делчево кон Бугарија. Неколкумина од нив се приведени и од истите се одземени 700 штеки цигари, од кои 600 штеки Јорк и 100 штеки Бенстон со бандерола и едно моторно возило – трактор./крај/со/бб