Обвинетите и адвокатите на обвинетите во процесот „Ликвидација“ без присуство на јавноста ги слушаа аудио и визуелните докази прибавени за овој случај, додека телефонските разговоро ќе бидат презентирани на 30-ти септември, кога и ќе продолжи судењето.

По презентацијата на посебните истражни мерки адвокатот на обвинетиот врховен судија во пензија, Јован Јоанидис изјави дека ПИМ мерките биле неквалитетни и биле незаконски прибавени.

Испитувањето на сведоци во овој процес заврши со исказот на Марјан Ефремов, уште еден сведок, брат на обвинетиот обвинител Ивица Ефремов. Во куќата на обвинителот беа пронајдени пиштоли, додека во куќата на неговиот брат беше пронајдено поголемо количество оружје и експлозив. Братот на обвинителот рече дека пиштолите им биле наследство од татко им, поранешен судија, на кого, пак, му биле подарок од Службата за безбедност за којашто работел извесно време. Тој тврдеше дека брат му не знаел дека во куќата има пиштоли.

Обвинителот, пак, Ивица Ефремов изјави дека бил присутен кога заштитениот сведок Бреза давал исказ пред истражен судија. Тој инсистирал на записникот да стои неговиот телефонски број, иако бил загрозен сведок и иако бил предупреден дека го открива својот идентитет. Бројот не бил на име на загрозениот сведок, но на него му ѕвонел Ѓоре од Америка, кој беше обвинет дека го нарачал убиството на старецот од Ореше.

Поранешниот претседател на велешкиот суд, Валентин Зафиров го дополни својот исказ и ги отфрли обвиненијата дека тој ургирал да му се укине притвотот на Зоран Манасков – Скршениот, еден од обвинетите во случајот Франфурт мафија. Тој се правдаше дека се интересирал за Јордан Јорданоски – Р’кулот, односно за предметот за којшто бил обвинет. Во тој период Зафиров од судија планирал да премине да работи како адвокат, но канцеларијата не му била уште отворена. Се распрашувал за предметот во кој е обвинет Р’кулот и планирал да го брани, ако му понудат 20 илјади евра.

Судењето продолжува на 30 септември со презентација на преостанатите ПИМ мерки. Меѓу обвинетите е и новинарот на Нова Македонија, Томислав Кежаровски кој е обвинет дека пред пет години незаконски го открил идентиетот на заштитетниот сведок во случајот Ореше, односно за убиството на старецот од ова село./крај/фф