Дел од лицата кои беа уапсени синоќа и утрово во големата полициска акција „Шпион“, освен што оддавале класифицирани информации и државни тајни на странски разузнавачки служби, се осомничени дека им давале информации за политичката и безбедносната состојба во Македонија и на поранешни политичари.

„Освен на странските служби, лицата имале контакт и со поранешни високи функционери, политичари од врвот, така што им давале информации за општата безбедност но и политичка состојба во Македонија“ изјави помошникот министер во МВР, Иво Котевски.

Уапсените биле предмет на обработка изминативе две години, а МВР ги сомничи дека оддавале класифицирани документи, државни тајни и други информации кои лицата ниту смееле да ги имаат, ниту смееле да ги споделуваат со странските безбедносни служби.

Освен за шпионажа дел од лицата се товарат и за уцена и измама и се сомничат дека изминатите неколку години обезбедувале информации за лица од јавниот живот или пак бизнис заедницата со кои би можеле да нанесат штета на нивниот углед.

Ги уценувале дека ако не им дадат пари, податоците кои ги имале за нив ќе ги објават на интернет сајтови или пак во медиумите кои ги контролирале дел од членовите на злостроничкото здружение.

Уапсени се вкупно 17 лица, по три лица сé уште се трага, а две лица кои се осомничени за овие дела, веќе издржуваат казна затвор за други кривични дела.

Меѓу осомничените по кои се трага е и новинарот Зоран Божиновски, кој е сопственик на интернет весникот „Буревесник“, додека веќе во затвор е Марјан Ефремов, братот на обвинителот Ивица Ефремов којшто беше уапсен во полициската акција „Ликвидација“. Марјан работел во Агенцијата за разузнавање, а беше приведен откако кај него беше пронајдено големо количество на оружје.

Голем дел од уапсените се и актуелни функционери, вработени во безбедносните органи на Македонија. Двајца се вработени во Агенцијата за разузнавање, двајца се вработени во Управата за безбедност и контраразузнавање, четворица се поранешни вработени во Министерството за внатрешни работи, двајца се моментално вработени и еден е поранешен вработен во Министерството за одбрана, три лица се сопственици на приватни фирми, еден е вработен во Собрание , еден вработен во Државниот архив и поранешен директор на управата за финансиско разузнавање.

Неофицијално се потврдуваат имињата објавени на интернет порталите меѓу кои се и шефот на кабинетот на собранискиот спикер, Маријан Маџовски, поранешниот директор на Агенцијата против перење пари, Ване Цветанов, поранешниот полициски генерал Горан Стојков, Александар Динески од УБК, режисерот и продуцент на „Контрабанда“ што ја подготвува емисијата „Еднооки“ Борис Дамовски.

Сите уапсени се на распит во полициска станица и против нив сé уште не е поднесена кривична пријава.

При претресот во домовите на уапсените најдени е обемна документација којашто содржела класифицирани информации.

„Обезбедени се поголем број на компјутери односно 27 лап топи, деск топ компјутери, обемна документација, досиеја кои содржат класифицирани информации, 32 мобилни телефони, усб стикови, мемориски картички, 16 парчиња огнено оружје, детектор за техника“ изјави Котевски.

Ваков случај на шпионажа за странски безбедносни служби е прв во Македонија, но и во регионот./крај/фф